乙巳流年

癸癸戊乙
亥卯寅巳

己戊丁丙乙甲癸壬辛庚己戊
丑子亥戌酉申未午巳辰卯寅

一睇呢八隻字就知道不是什麼好東西，癸卯日配上戊寅月，傷官格，局中無明顯金五行，屬於弱格，以呢八隻字論天下大勢，實在唔識，如只以此論一針之地的大勢，實在手到拿來，在乙巳年裡面，好明顯係無依無靠，亦無主動權。

每天一睜開眼就需要錢，就由錢開始，原局木強火弱，火五行係財星，既然火弱，就要木來生火，引申到現實世界，本地的人有好強的搵錢慾望，亦都有一定的搵錢能力，無奈想搵錢的人太多，但係錢太少，真係手快有，手慢無，任何時間都係醒目的人佔優，搵唔到錢的人就只好怨老爸，睇咗上面三百字，係唔係覺得呢個世界好唔公平呢，的確係呀，因為原局裡面並無道德這個東西出現，只有用不擇手段去搵錢才是正道，所以認為某種事係君子所不為的，就十足像浮生六記裡面的沈三白。

強木生火的社會形態就係講多做少，學咗其他地方，口號一大堆，完全唔實際，浮誇，為達目的大家鬥踩（如果唔明可以Ｅ過來問我。）

本年究竟做乜野行業先至搵到錢呢，原局係乙巳年，自然係以火為先，同火有關的行業必然優先，最簡單的就係賣炭啦（如果信就真係笑死人無命陪），實際啲就係做太陽能生意（點樣做我唔識，本年的特點就係得個講字），飲食業，走動行業，最不為人注意的就係坐喺度講野的人，尤其是隱藏在背後講野的人（乜野行業唔知，只係根據呢八隻字演繹出來而已）。

基於原局並無道德這個高層次東西存在，估計可以搵大錢的都唔係什麼好行業（乜野行業唔知，希望聰明人話俾我知）。

有咗錢自然要長命百歲，要長命自然先有健康，由於原局充滿動象，好容易解釋為以運動作為得到健康的橋樑，本年要有健康就必要多運動（阿媽係女人）。

本年原局有所欠缺，自然對健康有損害，根據呢八隻字可以推算一般人最容患的疾病有幾種，第一種係肝病（局中第一忌神），要預防亦好容易。第二種係肺部的病，防不勝防，只有自己小心。第三種就係骨折，行路帶眼就可保平安。

本年的社會動態就係身居高位的人一定要小心，分分鐘俾啲細既喺背插幾刀，死咗都唔知乜野事，（如果唔明可以Ｅ過來問我。）

至於方位方面，今年（寅）係忌神，自然係東北方，無論向東北或座東北，都係容易有意外，無得預防，只有自己步步小心，（如果想八卦下就掛個風鈴啦。）

其中以秋天金旺之月最易有意外。夏天火旺之月最易搵錢。春天木旺之月最多爭執，（同自己人），甚至有官司。冬天最好眠，乜都唔做就唔會出錯，有大件事留番過咗年才做。

本年生仔好過生女，男仔的運氣先天性比女仔好。本年如要買樓，一定要買大單位（三房），如果買唔起，就儲多啲錢，留番明年再算。