命理周邊知識

十神沖合 陽日干財合日主

甲己合:係財合日主,一般財合日主都認為係財星情向日主,就以為對日主一定有益,有冇益都要睇日主的強弱,最重要就係己土的特性,己土最明顯的就是中正畜藏,有包容性,反映出財星同日主的關係,男命以財為妻,有己透出而有根,表示會有一個好賢良淑德的老婆,因為己土財星有容忍度,同時亦可以平衡母子之間的感情,即係可以減少婆媳之間的沖突。

庚甲丙己
午子寅未

甲木寅月,日坐正印,年柱正財,七煞無根,地支寅午火,午未火,有丙火透出,日主之力盡向財星,印星被日主排斥,因為身強先天性不要印星,一般就係以財星破印,但係己土係唔會剋盡印星,因為係有情之剋,同時發揮己土的包容性。

丙辛合:辛金合日主,丙係太陽之火,辛係柔弱的金,辛金的特性係器量小,最怕土多,即係男命以辛金為妻,不可對之言聽計從,不適宜愛惜過於表面化,即係只可以擺在心裡,因為辛金性格鍾意表現,如果稍為倚重,或者俾佢掌權,就好容易連日主的光芒都蓋過,但係如果有適當的管制,就會好忠心。丙火日主未必一定要身強,都可以得到財星的助力。

丁丙辛甲
酉辰未寅

丙火未月,傷官格,以寅為根,日坐食神,辛金財星通根於辰酉,財旺身弱一路行財生官運,如果日主唔了解財星的性格,就會俾財星牽住走。

戊癸合:戊土日主與癸水正財相合,戊係高山燥土,而癸係雨露之水,如果戊土日主命中無正財,呢個人一定係粗人一個,因為癸水財星係日主的智囊,亦都會令到日主的性格由偏激固執變成有適番些少靈活性,亦都表現出交際手腕,癸水財星對日主的助力真係好大。

壬戊癸丁
戌子卯未

戊土卯月,正官格,年柱丁未,卯戌合火,卯未木,丁壬合木,一片木火土旺,全靠癸水財星令戊土日主有番些小智慧,最忌行戊戌運,重疊卯戌合化火,剋合財星,令日主失去財星的助力。

庚乙合:庚金日主以乙木為財,以乙木為妻,庚金日主,命中有乙木財星,就會好多爭拗,源於庚金的性格,不重視財富,而乙木的性格係以控制財星為樂。(刲羊解牛)樣樣都要自己掌握,所以如果庚金日主力量唔足以食實財星,就會家無寧日,同時乙木亦都對細小的事好著意,即係小小野都睇唔開,只有增加日主的煩惱。

乙庚丁己
酉辰卯未

庚金卯月,正財格,卯未合,有乙木透出,財星的力比自己大,卯木剋合未土,可以預見財星好霸道。

壬丁合:丁火正財合日主,壬水命格有丁火正財在內,就可以得到財星的助力,丁火對於壬水日主係全心全意,丁火的性格會將大部份的不滿擺在心內,唔會少少野就黑口黑面,只會過後計數,真正做到在屋企照顧老公的身子,在外面照顧老公的面子,但係好可惜,壬水的性格係忘恩的。

丁壬甲戊
未寅子辰

壬水子月,子辰合水,甲木食神透出通根於寅,丁火正財弱,身強財弱格,財星的力不足以左右日主的決定,以日主的意見為主。

丁壬丙壬
未戌午申

壬水午月,午戌火,午未火,有丙丁火透出,財強身弱格,年柱壬水幫身,呢度的壬水日主反而情向丙火,而丁火就唔會同丙火爭奪,因為有正官泄丁火的力。

食神合官星

食神同傷官係對立的,但呢兩樣野的本質係相同,之所以係對立的原因就係傷官無可能與官星同處,而食神就可以同官星相合,某種情況之下,傷官只可以同七煞相合,所以食傷雖然同一組合,但係細分起來,就發覺呢兩樣野都係處於對立的位置,好似呢個題目,食傷幾時都係制官煞的,傷官專係針對官星,但係同一組的食神竟然會同官星相合,合即係和,即係無咗對立面,反而重產生另一個五行,對日主產生另一種吉凶元素。合住官星,即係唔受管,但係食神會將所有既野擺在心內,所以有陽奉陰違的現象。

甲木日主︰丙火食神合住正官辛金,正官的特性就係公正,有管的意思,而辛金的特性係要面子,又唔鍾意守規距 (因為金鍾意水),食神就係樣樣都無所謂。而丙火的特性就係黑白分明,處事快捷,食神合住官星之後,會令到日主有持無恐,因為將官星的性質改變咗。官星對日主的規管能力同公正力都減低甚至消失,代之而起的變成對日主的縱容(丙辛合水成印),都會影響日主的性格。

庚甲丙辛
午午申卯

甲木申月,七煞當令,有官煞透出,日坐傷官,有食神透出,甲日主以卯為根,原局官煞相混,身弱以食神合官制煞,呢個人做野就唔會三心兩意。鍾意主動爭取,食神係被動等人賞識,戊土的本質係唔想變動,癸水官星亦都偏向保守,戊癸相合之後,食神同官星的作用都會轉弱,弱之中偏向於食神,所以食神的力仍然可以影響日主,呢個人的性格都係唔鍾意有管朿,既然合住官星,自不然係將一般的規矩放諸腦後,鍾意自由自在﹐思想天馬行空,做野唔多實際,鍾意花錢,如果有財運行就會改變性格,反而鍾意搵錢。

癸丙戊辛
巳申戌卯

丙火戌月,食神格,有戊土透出,日坐偏財,有官星透出,丙火通根於巳,卯戌六合化火,無比劫透出,癸水官星對日主的影響力不大,現在俾戊土食神合住,日主的性格就自然偏向於食神方面,官星的正面作用對日主唔產生作用。

戊土日主︰庚金食神合乙木官星,乙木官星對戊土日主的作用好大,源於乙木的性格,乙木善於控制掌握,庚金食神與乙木相合,庚金的特性同乙木有所不同,庚金能夠將周邊的事物包容,五行之中金主義,只係針對甲木,對乙木有融和作用,所以乙同庚合而化金,戊土日主少咗乙木官星的制約,行為思想都變成活躍,少咗戊土唔願郁的特性。

癸戊乙己
亥戌亥酉

戊土亥月,偏財格,癸亥時,有金生水,有乙木透出以亥為根,有剋日主之力,戊土日主只靠戌土為根,正式又剋又泄,第五個大運庚午,庚金以酉為根,合住乙木官星,將官星的正面作用減低,呢個人講野未必係真的。

乙戊庚己
卯寅午酉

戊土午月,地支寅午半合火局,乙卯時柱官星有力,劫財無力幫日主,印重身輕,加上有官生印,呢個人一生都唔可以楂主意,庚同乙合,但係庚的根酉俾寅卯沖正,庚金食神無力,行到申運,沖開寅木,寅午合不成火局,庚金有力合官星,戊土日主就會有自主力。

庚日主︰壬水食神合丁火正官,五行相剋分別有金木相剋,火金相剋,木土相剋,土水相剋,水火相剋,幾種相剋的物質,除咗水火相剋之外,其他幾樣都係要有結果,即係要分勝負。呢度的壬水剋丁火其實唔係真的剋,只不過係相輔相成的一種現象。丁火係靜態的表現,所以丁火正官對日主的管朿不知不覺中發揮管的效果。壬水係動態,明顯的,所以壬水食神的特性亦偏向於主動性,壬水合住丁火正官產生對日主的影響力就係明刀明槍,令到日主的膽量都好D。

丁庚壬庚
亥申午申

庚金日主的力最大(丁壬合,亥午合,水火都無力),本命唔需要倚靠水或火來平衡命局,呢度原局壬水以亥為根,丁火以午為根,丁壬相合都要互相倚靠,並唔存在邊個的力量比較大,原局因為官星當令而無財,所以庚金日主雖然身旺,仍然都係無乜膽量,但丁壬相合化財,令日主做事有番D膽量。

壬日主:甲木食神合己土七煞,壬水日主唔驚戊土七煞,因為壬水有靈活性,七剋雖然霸道,都唔會制死壬水,但係最忌己土正官,壬水最重要就係清,水清就有智慧,濁就無智慧,正式係級數都低D。壬水日主如果正官的力過大,呢個人就萌塞,無長遠的計劃,智慧唔開,只有小聰明,睇落好似好聰明,其實係豬頭丙,如果有甲木食神合住己土,令到己土的性質改變,呢個人的智慧都隨之而有改進,一般人只以為甲己相合都係化番土,但係唔知所化的土已經唔同咗性質,所以對壬水日主的作用都唔同咗,本來唔識去爭取或者唔敢去爭取自己的權益,經過甲己合之後就變成有鬥志,肯出力去爭取。

戊壬己己
申寅巳酉

壬水巳月,官煞齊透,身弱,無比劫幫身,印星不足以化官煞之力,呢個人好難有自己的主意,容易受其他人所左右,女命就受男性左右佢的意志,因為容易動搖,男命比女命幸運,因為男命第五個運行甲子,甲木合官留煞,子水幫身,呢個人自然會一洗頹氣,俾人覺得零舍叻咗。但係女命就無咁好,因為第五個係甲戌,七煞的力過大,日主無水,所以仍然係一個受壓迫的命。

庚壬己甲
戌戌巳辰

壬水巳月,日坐七煞,戌時,辰年,屬煞重身輕格,偏印透出無根,正官透出,原局衰在有己土透出,混濁壬水,諗D野都低級D,年柱甲木合己土,對日主的助力都唔大,除非行到水運,就有小小自主能力。

陽日主劫財合七煞

甲日主︰乙木劫財合庚金七煞,當日主身弱的時候,命中七煞的力就浮現,首先要知道七煞的特性,命學中有治世(太平盛世)以官為用的人就有出頭機會。亂世就以七煞之人冒起,就係(治世用官,亂世用煞)。因為七煞有力的人鍾意在唔安定的環境之中找尋機會,或者在唔安定的環境之中可以制做好多機會,只要有紛爭,有沖突的地方,七煞格的人就可以乘機冒起,凡一個團體,公司,甚至乎一個地區,只要有亂象,就會有七煞格的人出現。八字命局平和的人,只會隨波逐流,跟大隊,最簡單好似股市大跌的日子,呢種人只有眼光光睇住個市跌,只有諗幾時可以升番。

身弱就忌七煞攻身,即係俾人欺負,壓迫,而呢種欺同壓,只有越來越大力,因為庚金的特性,係開始咗就唔會停的,所以甲木日主最忌身弱,身弱之中又最忌遇煞,所謂身弱見鬼,可以成個大運都無轉彎機會,點樣先至有轉機呢,就係要有劫財出現,只要有乙木劫財出現,就會將七煞合住,就發揮唔到剋制,欺壓日主的力量,點解乙木劫財令到甲木日主唔受欺壓呢,就係乙木的性格,就係乙木所擁有的就要完全佔有,所以唔容許庚金再有財星。

戊甲庚戊
辰戊申寅

甲木庚申月,七煞格,日坐偏財出,日主只靠年支寅木幫身,但係不足以幫日主,因為煞強重有旺財生煞,甲木日主就會身不由主,但係行到乙運或者卯年就會有突如其來的人出現幫忙。

丙日主:壬水係七煞,壬水七煞對丙火日主未必會好似庚甲咁無情,所以日主身弱都唔會受過份欺壓,所以只要見到少少丁火就會令到壬水唔會做D過份的事,但係如果日主身強,遇見丁火合煞就會令日主發揮唔到爭權奪利的能力。

丁丙壬壬
酉寅子戌

丙火子月,正官格,有兩壬水七煞透出,以七煞為表達,有財生煞,丙火日坐長生(掌字音),丁火劫財透出,但係冇力合煞,即係身邊的人未必有幫日主的能力。

甲丙丙壬
午子午戌

丙火午月,有丙火透出,地支午戌合火,有甲木生火,有壬水透出,通根於子,丙火日主身強,以財生煞為用,但命中財弱,不足以助煞,命中注定好難出名,如果再行丁火劫財運,就會合住壬水,就會連小小鬥心都無埋。

戊土日:以甲木為七煞,戊土日主鍾意安定,一板一眼,但係如果遇到強有力的七煞運,破壞咗命局的穩定性,除咗生活環境改變之外,重會令到日主的性格都會變埋,可能會由一個好隨和,與世無爭的人變成一個斤斤計較,周身刺,做事只論輸贏,不論手段,但係如果在呢段時間裡面有劫財出現,即係有己土出現,己土會令甲木產生一種包容性,性格就會無咁偏激,轉而為平和,運氣都好D。

丙戊戊己
辰子辰卯

戊土辰月,辰時,有比肩透出,劫財幫身,年支卯木正官,日坐正財,子辰半合水局,有火生土,日主身強,以財生官為用,但係行甲木七煞的大運或者流年,財生煞就以為能掌大權,但有己土合甲,劫財合煞做事就會功虧一簣。

甲戊己乙
寅申卯丑

戊土卯月,有甲乙木透出,日坐食神,以丑為根,甲木七煞坐長生,直接功剋日主,原局己土劫財合煞,命中會有一班好兄弟,之後就要睇大運。

庚金日:庚日主以丙為七煞,當以七煞為忌的時候,最好就係有辛金劫財合住七煞,免致火煞剋攻身,庚日主遇丙火七煞,就會特別辛苦,真係頭頭碰著黑,做乜都唔成功,因為丙火的性質,(能鍛庚金),要丙火七煞轉弱,就要有辛金出現,就係(逢辛反怯),就自然由荊棘滿途變成好順利。

丙庚甲辛
戌戌午未

庚金午月,午戌半火局,午未六合化火,日主只有微根在餘氣內,丙火七煞攻剋日主有力,只靠辛金劫財合煞,但係劫財無力,要等到水的流年或者金的大運就會有好運。

壬水日:壬水以戊土為七煞,壬水的性格樂觀好動,愛自由,喜歡做乜就做乜,但係如果行運遇到有力的七煞,做野就身不由主,受到束縛,發揮唔到自己的才能,但原局有癸水劫財就產生化解七煞的效應。

庚壬辛癸
子戌酉亥

壬水酉月,地支亥子水,有癸水劫財幫身,印星當令有透出,日坐七煞,但係七煞無力,日主係大頭菜一名,第三個運戊午,戊土七煞有力,可以制衡日主的任性,但係俾有力的癸水劫財合住,身邊就會有一班豬朋狗友。

陽日主偏財合正印

偏財同正印在命格上面係對立的,陽日主的性格比較明顯,表面化,好容易俾人睇出,尤其是在行為上表露咗自己的心態,最明顯的就係唔鍾意靜態,如果命格本來就有財印存在,而第一個大運或者流年偏向於財的話,呢個人就肯定唔鍾意坐定定,所以一般來說就係同書本無乜緣份,流年的影響力不容忽視,如果咁在進入另一個階段的時候,行財的流年,就會令家長好勞氣。成年人遇到呢D咁的形態,就會發生三種狀況,第一呢個人性格有所改變,無以前咁斯文,講說話的用詞都有明顯的分別。第二個顯著見到的就係對老人家的態度,未必再有敬老之心,如果以前成日去老人院,現在就自然有好多無謂的事,令到佢減少去探老人家,甚至唔會去。第三個明顯的就係減少咗捐錢,可能以前係一個善長仁翁,但係在好短的時間內就判若兩人,無論本來係印強或者印弱,一遇偏財就會有改變。

甲日主︰以戊土為偏財,以癸水為印,戊癸合化火,火係日主的食傷,印係代表正經、文學、斯文,而以癸水為印的人,性格上唔多實際,偏向於幻想,對金錢無熱切的追求,有學者或藝術家的氣質,鍾意遊山玩水,但戊土的特質係重實際,對錢好重視,癸水印俾戊土合住,呢個人就無咗想像力,每一樣都以利益為出發點,如果地支有明火出現,呢個人重會不擇手段搵錢,以前唔會做的野,現在變成理所當然,例如一個風水師行印運的時候好正派,一切都依學理去處理風水事宜,但當行印星被財星合住的運,就會變成一個又呃又嚇的人,以搵好多錢為榮。

乙甲庚癸
亥辰申卯

甲木申月,日坐偏財水庫,有七煞透出,乙木劫財透出,通根於亥卯,癸水正印透出通根於亥,印有能力左右日主,第二個大運戊午,戊土財以辰為根,有能力合住癸水印,十七、八歲,個個都以為佢考大學無問題,點知偏偏就係考唔到,原因就係財合印,壬戌年撞到正。

丙日主︰以庚金為偏財,以乙木為印,乙木印以保護為主,所以丙火就算生在冬天,只要原局有乙木,就唔怕有其他的剋泄,丙火的性格偏向於心軟,如果再有一個稍強的乙木印,呢個人的處事方式就好明顯唔公正,偏心。如果原局或者大運流年有庚金偏財出現,就會將乙木印星剋合住,令日主的缺點減低甚至消失,因為財合印之後所化的野亦係才或者財,大部份偏向於化財因為財的性質重實際,處事無咁心軟,同鍾意文學與否無關。

甲丙癸乙
午子未卯

丙火未月,傷官格,有甲乙木透出,通根於卯未,日坐正官,有正官透出,丙火日主以午為根,命格係官生印,命中無財,傷官當令,但係無力,不足以制官,所以印星的力就變成獨大,可以左右日主的性格,呢個人如果係老闆級,一定用人唯親,如果係打工仔一定出盡法寶拉攏人事關係,第三個行庚辰財,庚金虛浮根,不足以合住乙木印星,並無機會改變呢個人的處事作風,呢一世都唔會轉性,因為乙木正印永遠都無偏財剋合到佢。

戊日主︰以丁火為印,壬水為財,戊日主的先天性格就唔鍾意變動,鍾意保持現狀,如果有丁火印星,呢個人就更加只係想,唔會切實去實行計劃,諗野就一大堆,正式係小人常立志,每一日都諗住今日要做乜做物,明日又諗同樣的野,後日都係一樣,總之無一樣野做得成,最主要的原因就係唔願郁,最常見的現象就係有一樣野沉迷咗,例如以前的捉棋,現在的睇小說,更多的就係打機,戊日主印有力就好容易為一樣無謂野廢寢忘餐。如果大運遇到有力的壬癸水,就會荒廢大半生光陰,所以知命好緊要。

壬戊甲丁
戌戌辰巳

戊土生於辰月,身強,有丁火印透出,以巳為根,更增加日主的旺氣,日坐比肩,地支一片火土,壬水偏財透出,財合正印,但亦不足以剋合丁火正印,所以呢個人的性格只重空談,而無實質行動,正式係想多做少(財星完全發揮不到作用),但係好彩去到第五個運就見到亥水財星,原局壬水以亥為根,壬水的性質樂觀、好動、唔會成日緬懷過去,即係有番D生氣,可惜俾有力的巳火沖正,正式係運到都無力,就算有心改變己經無能力,如果早點知命,就可以就命格的缺點而加以糾正,知命真係可以改命。

庚金日主︰以己土為印,甲木為偏財,庚金的性格有正義感,唔鍾意停,做事流於表面化,要面子,如果命中有強而有力的財,呢個人做野就唔會流於表面,每一件事都要有實質利益先至會做,因為甲木的特質正直,有堅強的意志,唔完成一件事係唔會停的。但係如果遇到己土印,就會令到日主倚賴性,發揮唔到庚金日主的特性,如果原局有土,再行土運,就唔單止合住甲木,重化土,變成土厚埋金,所以發揮唔到應有的才幹。

甲庚辛甲
申午未辰

庚金未月,正印當令,年柱偏財,日坐正官,日主通根申,有兩甲木才透出無根,屬於印重身旺的命格,如果行財星破印的運,呢個人就會有番D鬥心,唔會終日沉迷於某一樣野。

壬水日主︰以丙火為偏財,以辛金為正印,壬水的性格最鍾意週圍去,唔鍾意受到約束縳,如果呢D人有鬆動的金錢必定係出色的旅行家,足跡遍天下,如果有丙火財星,可以發揮日主的影響力,必定係一個名滿天下的人,但係如果遇到辛金印星,就會將丙火的能力合住,變成丙火的力唔可以借日主影照出來,即係減低咗日主的影響力,如果壬水日主係公眾人物,有適當偏財,就會有非凡的影響力,或者可以講成係一個有魅力的人。但係當有辛金印星現的時候,就變成一個靜態的人,無晒活力。

甲壬甲丙
辰戌午申

壬水生於午月,有丙火偏財透出,地支午戌會火,有兩個食神透出無根,日坐七煞,辰戌沖,財煞的力量最大,屬於財強身弱,呢個人做野過於虛浮,計劃多而實行少,見身郁而不見成果。第三個大運丁酉,遇到辛酉流年,有力的辛金合住丙火財星,呢個運就有一個好的開始。

陰日主劫財合偏財

乙木日主 甲木劫財合己土偏財

劫財的作用,正面的就可以幫日主對抗官煞的壓迫,泄弱印星的掩蓋,身弱的命就需要劫財的助力,但係日主強或者旺的時候,劫財就絕對係負面的野,當日主的財星弱,最忌就係見到比肩劫財,而比劫之中劫財係最忌。偏財係命中不定之財,或者係突然間得到的財,財星被合,最表面的解釋就係有人謀你的錢,但係分開比肩同劫財,呢度係劫財合偏財,劫財的特性帶有霸道,主動爭取,而甲木劫財的特性亦都係代表堅強,唔輕易放棄,所以乙木日主如果身弱,財旺,而有劫財幫身,就表示會有一個好有力的朋友或者兄弟對你有幫助,係關於錢銀的事。但係如果身強財弱,而有劫財出現,合住偏財,就自然有一個甚至乎多個人出現,令你破財,如果原局有就正式係命中注定身邊有人成世向你攞錢,如果大運遇到,就真係成五年或十年有人向你提供一種好有前景的投資,一定令你破大財。如果流年遇到,就表示身邊突然有人向你借錢,通常無得還,但係想唔借都唔得。

己乙辛丙
卯亥卯辰

乙木卯月,日坐正印,亥卯半合木局,有偏財透出,通根於辰,辛金七煞透出無根,丙火傷官透出無根,建祿格,身強之命,偏財坐比劫,財弱。行甲木劫財運之時,劫財有力,在呢個運裡面一定有一種好大誘惑的項目,或前景好好的職位,令你心郁郁跳槽,到頭來可能無咗份工,或者破財。

己乙辛丙
卯丑丑辰

乙木丑月,偏財格,寒木兼身弱,有偏財透出,日主雖然係弱,但係都有卯木為根,偏財的力大於一切,呢個人一定偏向於大膽,鍾意搏,因為現實生活一定有好多無謂的錢要使,第四個大運甲辰,甲木劫財合己土偏財,在呢個大運裡面做事會穩陣好多。

丁火日主 丙火劫財合辛金偏財

丁火日主的特性最容易睇出的就係外柔內剛,唔鍾意出風頭。而丙火的特性就係性急,想好快完成一件事,而辛金財星又係鍾意面子,兩樣相合之後,就對日主產生一種壓抑作用,由好鍾意使錢,變成對使錢好謹慎,尤其是身弱的命,財強就俾其他野左右日主的性格。如果遇到有力的劫財,就會令到日主的性格堅強,無咁容易俾身邊的人左右自己的決定。

丙丁壬丙
午未辰子

丁火辰月,傷官格,日坐食神,子辰會水,有正官壬水透出,午未化火,有兩個丙火劫財透出,命中無財,無論官煞,或者劫財都需要財星,大運偏向於比劫,所以就更加需要財,但係無論大運或流年,都遇唔到有力的財星,呢個人一直都無量度同其他人相處,更加無可能同其他人合作做意。

己土日主 戊土劫財合癸水偏財

土日主身弱的機會好少,遇到比劫的機會好多,己土日主如果身強偏財弱,就唔似其他日主的特性,起碼膽無咁大,亦都無咁強的僥倖心。但如果再遇到戊土劫財,將癸水偏財合住,呢個人就會行險僥倖,交際手段亦都好差。如果身弱財強(現實生活之中係好少的),遇到戊土偏財,就有足夠能力保護日主的財,幫日主控制財星,做事有自主能力。

戊己乙癸
辰未卯卯

己土乙卯月,七煞當令,有劫財幫身,癸水偏財透出,以辰中弱水為根,劫財與偏財之力相差好遠,日主的財明顯俾劫財所掠奪,現實生活中呢個人好難剩錢。

辛金日主 庚金劫財合乙木偏財

庚金的性質係霸道,而乙木亦都係不相上下,本來相合之後產生同一樣野,但係因為角色不同,現在劫財與偏財的關係,注定係爭奪與霸道的狀況,就要睇原局裡面邊樣比較樣強,因為五行無絕對,強者勝。如果庚金劫財的力大,呢個人肯定無錢剩,因為周圍會有好多伸手的人,最主要就係唔俾唔得,所以性格上久而久之就會形成周身刺,對一般人都無一種信任的態度。如果乙木偏財的力大,呢個人就鍾意使錢,好慷慨,雖不致視錢財如土,但都係一個無錢剩的人,但係人緣好好。

庚辛己乙
寅酉卯卯

辛金卯月,卯年,寅時,偏財的力最大,日主坐比,有劫財透出,日主的性格一定俾偏財所左右,即係好動,好使錢,鍾意應酬,充份顯示出偏財的負面作用。(包括有好多女人)。

庚辛乙乙
寅巳酉巳

辛金酉月,巳酉半合金局,有庚金劫財透出,乙木偏財通根於寅,係身強財弱之命,劫財的力合實偏財,呢個人一生都有好多親戚朋友伸手,因為巳同酉合,連不相關的都變埋比劫。

癸水日主 壬水劫財合丁火偏財

癸水好靜,壬水好動,劫財推動日主的性格,癸水日主如果原局劫財旺,性格開朗,有主動性。如果偏財旺,偏財有力左右日主的性格,所接觸的人(尤其是女人)一定性格固執,自私,令日主無能力控制財星,最簡單的情形就係女人唔聽話,大部份都要用錢攪掂。(偏財相對於日主就係七煞,偏財係日主的女朋友,七煞係男朋友,如果控制到七煞,就自然要乜有乜)。

丁癸壬壬
巳酉子子

癸水壬子月,壬子年,地支巳酉相合,半會金局,生水有力,丁火偏財坐巳,虛有其表,劫財之力最大,包括日主在內,都需要丁火偏財,呢個人對錢自然好緊張,但係命運專同人作對,想剩錢但偏就無錢剩。

壬癸丙丁
戌亥午巳

癸水生於丙午月,丁巳年,地支午戌半合火局,癸水日主以亥為根,壬水劫財幫身,亦以亥為根,但巳亥沖,有力火沖無力水,壬丁相合,丁火之力足以控制全局,日主必受丁火偏財左右,正財之力不及偏財。(因為偏財己控制住官煞)花心蘿蔔一名。

陰日干傷官合七煞

傷官的特性某程度上同七煞好相同,首先就係剋制正官,呢種剋制並唔係唔准做乜,唔准做物的制,而係唔同意,搗亂,唱反調,對一般約定俗成的規矩都要破壞,另一方面要否定叻過自己的人,又要盡量表現自己,即係鍾意出風頭,重視自己的名譽,亦都重視其他人對自己的評論,鍾意批評其他人而突出自己,如果自己身為上司或領導層,就一定唔會俾機會下屬,有功勞一定係自己的。傷官的性格有好多缺點,但係優點都唔少,例如聰明,好勝,(好勝就有上進的推動力),但亦有部份係(牙擦)而無料的,腦筋轉動得快,識得利用周圍的環境,例如人事關係,或者利用一般無腦的人捧高自己,同時學野亦都好快,所以多數都係慱學之士,與人相處第一個印象俾人覺得好叻,講野好風趣。

七煞的特性就係唔服輸,有氣魄,腦筋敏捷,自制力強,見義勇為,不畏強權,所以作反的人多數係七煞有力的命格,七煞有力的人有一種無形的向心力,自然引動一班有能力的人幫助自己,而本人亦有領導才能,但性格上亦有其缺點,就係處事過於急進,手段過激,以致難以與人相處,亦甚少知心朋友,所以七煞有力的人多數孤獨,由於鬥心極強,永遠不滿現狀,要突破創新,所以一生起落很大,好唔穩定,行運的時候一飛沖天,失運的時就一沉百踩,而七煞另一特性係善於消耗金錢,行運的時候好識用錢去利用人材,失運的時候就會變成一個敗家仔,尤其是煞強財弱,身又弱,就係一個只識使錢,或者變成社會的負擔,所以傷官同七煞都只係適合日主有力的命格。

乙木日主 丙火傷官合辛金七煞

乙木加丙火就自然有一番作為,乙木日主要做成一件事一定要做成功,而丙火傷官亦都係心急的特性,木火傷官本來係最有智慧的一種,乙木丙火傷官做野好快,有好長遠的思慮,但係俾辛金七煞合住就唔同晒,無咗傷官的計謀(亦都可以話係詭計),諗野快捷,亦都唔種意學野,變成有惰性,無鬥心。點解話辛金七煞合丙火傷官呢,因為傷官同日主係同一陣線,而七煞係外來的壓迫力,同時傷官係自己的本性,所以先睇傷官,但係都有例外,就係原局無傷官,只有七煞,行運遇到傷官,就變成傷官合七煞,就變成無咗七煞的特性,結果都係一樣。

壬乙辛丙
午卯卯子

乙木卯月身強,正印透出有根,有丙火傷官透出有根,有辛金七煞透出無根,七煞對日主的影響力好細,傷官又合住七煞,所以印的力量最大,身強最忌印,但本命有用的五行都化成印星。

丁火日主 戊土傷官合癸水七煞

火土傷官係咁多種傷官中最差的一種,命中有傷官的都係聰明人,但係呢種係聰明人裡面最唔聰明的一種,全靠有七煞平衡火土的旺氣,呢個人就無咁主觀,無咁萌塞,但係當七煞被合之後,就加重咗火土的力,唔單止無七煞的特點,重將七煞的優點變成缺點,就係蠻不講理。

癸丁戊戊
卯亥午寅

丁火午月,寅午會火,寅亥合木,亥卯合木,有戊土傷官透出,以火土為根,有癸水七煞透出,以亥為根,日坐正官,身強之命以七煞為用,可惜七煞的根被合,變成傷官的力大過七煞,呢個人只有火土的固執而無七煞的權威。

庚丁癸戊
子亥亥寅

丁火亥月,正官當令,日坐正官,有七煞透出,以亥子為根,有正財生官煞,正官格以七煞透出主事,身弱煞強,樣樣受制於人,以傷官合煞,即係以自己的才能對抗惡劣的環境,第三個運丙寅開始火有力,就有能力發揮自己的才幹,但真正行運都要到第五個戊戌運。

己土日主 庚金傷官合乙木七煞

土金傷官,在幾種傷官形格之中,呢種係比較實際的一種傷官形格,傷官本身最想做的就係生財,所以命中有傷官的人,一定要連帶有財星,如果財星好弱,或者完全無財星,性格上一定有問題,其中最明顯的就係針對叻過自己的人,例如老闆上司,就算在同輩之中都要踩低其他人先至舒服。而土金傷官必需要有財星,假定無財星轉化傷官的力,就要睇吓有冇煞去合傷官,有煞合傷官就性格上的缺點就會減少,甚至乎消失。

庚己庚乙
午酉辰卯

己土辰月,因為立夏前十八日,所以係身強之命,有午火幫身,有庚金傷官透出,以辰酉相合為根,日坐食神,身強傷官旺格,呢個人的性格一定係唯利是圖,乙木七煞在年柱,理論上就合實傷官,都要睇行乜野運,先至決定七煞的力。

庚己己乙
午卯卯卯

己土卯月,乙卯年,日坐七煞,煞強身弱,只有午火幫身,七煞的力完全針對日主,庚金傷官合七煞,實際上傷官無力合煞,只有等運到。

辛金日主 壬水傷官合丁火七煞

金水傷官係咁多種傷官形格之中最多人掛在口邊的一種,因為論命的多數係男人,而金水傷官所應的事多數都同男女之事有關,事實上金水傷官在女命上表現得較明顯,例如靚樣多,皮膚白晢的多,性格較為開放,男女之間的關防無咁嚴密,在男女關係上亦都較為反覆,所以遇到金水傷官的女命就特別多野講。

丁辛壬壬
酉亥子戌

辛金子月,有傷官透出,日坐傷官,辛金日主通根於酉,有丁火七煞透出,以年柱戌中丁火為根,成組都係水的世界,金水傷官的性格表露無遺,因為命中無正官,所以種意點就點,用神以時干丁火合傷官,只要行運令到丁火有力,呢個人又叻又規距。

甲辛丁壬
午亥未戌

辛金未月,偏印格,有丁火七煞透出,通根於午戌會火,午未化火,有甲木生火,是為煞旺身弱之命,日坐傷官,有傷官透出,傷官合住旺煞,有機會發揮自己的才幹,最種意同叻過自己的人作對。

癸水日主 甲木傷官合己土七煞

甲己合土,木火傷官就係有智慧的表現,水木傷官俾人一種聰明的感覺,所以命理經典話︰(水木傷官要財官兩見始為歡)因為有才幹,有番咁上下腦筋,如果無機會都係等於零,所以水木傷官的人多數都好識得掌握機會,癸水日主最忌己土七煞,就係癸水傷官忌見官,尤其忌戊己透天干,癸水日主已經怕官煞,就要用傷官制官煞,但係俾七煞合住傷官再化番官煞,呢個人就變成腦筋唔靈活,唔識掌握機會,如果再行財生官的運,就會俾人撁住走。

癸癸己庚
亥巳卯戌

癸水卯月,食神格,有己土七煞透出,通根於戌,日坐正財,卯戌化火,無財星透出,己土七煞有力,又無傷官合煞,要去到第五個運甲申合煞,都有表面風光。

甲癸甲庚
寅亥申戌

癸水申月,正印格,有庚金透出,月柱時柱甲木傷官透出,通根於寅亥,印強傷官旺,就係一般所講的傷官佩印格,既然有印制傷官,就唔需要七煞合傷官,如果有七煞出現就行衰運。

陰日干食神合正印

乙木日主 丁火食神合壬水正印

食傷同印星就一定係對立的,一般都係印制食傷,在現實生活裡面,印星係講究規矩,鍾意正經的人,專注去學一樣野,性格亦都偏向於照顧同愛護。而食傷係要破壞規矩,無忍耐力,同埋說話尖酸,唔俾面。丁火食神就有一鍾契而不捨的精神,壬水正印有足夠的影響力,丁同壬相合之後化比劫,本來食神生財,而俾正印係合住的話,好肯定呢個人都唔使慌有錢剩,因為合住食神,就無生財的力,而化比劫,亦都係分財的野。

壬乙丁丙
午丑酉寅

乙木酉月,日坐偏財﹐日主通根於寅,酉丑合金,是為煞強身弱,有丙丁火傷官食神透出,通根於寅午會火,身弱用印星幫身,正印壬水透出無根,又俾丁火食神合住,丁壬合化比,當印星無力而靠比劫,就肯定辛苦。

庚乙壬丁
辰卯子巳

乙木子月,日坐比肩,正印壬水透出,通根於子辰會水,丁火食神透出通根於巳,庚金正官透出無根,日主有根有印有食神,獨係官星無根,丁壬相合,更加重印強身旺,任性而無創作力,無想像力。

丁日主 己土食神合甲木正印

食神係低調的表現,己土食神係有耐性的表現,任何事情都鍾意參與,但係唔鍾意出面,亦都唔計較名次與回報,即係做成一件事,唔提佢個名都得的。而甲木正印性格中正,有推動日主向上的能力,但係正印性格係剋食傷的,所以正印有力的人就一定無咁多花巧,做野鍾意直接,尤其是係甲木正印,而己同甲合變成日主的傷官,所以命中咁樣相合的人一定好唔實際,因為己土弱的機會好少,而甲木弱的機會多,一般人以為甲合己,令己土無力,但係相合就一定要睇邊個有力,如果甲木有力,呢個人就重有番D鬥心,因為生有少少甲木的特性。

己丁辛辛
酉卯卯卯

丁火卯月,偏印格,辛金偏財透出有根,己土食神透出無根,好明顯食神最弱,所以呢個人無食神的特性,第三個大運甲午,日主有力,甲木正印合食神,就變成甲木的影響力仍然有咁上下。

己土日主 辛金食神合正印

辛金食神的影響力好大,因為己土係陰土,係濕土,燥土埋金,潤土就生金,除非命中燥土好有力,否則食神的力一定對日主有好大的影響,樣樣都隨緣。而丙火就啱啱相反,本來印星係化繁為簡,唔鍾意複雜,但係丙火印星就較為霸道,印星制傷官就係正常的,對食神只係與佢相合,而丙火對辛金除咗合之外,重要控制,而食神的作用係生財,丙火印星有力就令到日主的財源斷絕,即係命中丙火印星有力的人,就自然唔鍾意搵錢,或者無搵錢能力,丙同辛合化水,水係己土日主的財,但係丙火過旺就令到財星的力消失。

辛己丙戊
未未辰午

己土辰月,有正印,劫財透出,通根於地支的火土,一片火炎土燥,有辛金食神透出,無根,丙同辛合化水,但係水無根,只係虛浮之水,辰中一點癸水不足以作為己土的財,呢度燥土的力大於一切。

壬己丙戊
申酉辰午

己土辰月,有正印透出,通根於午,日坐食神,辰酉化金,身強食傷旺,第四個大運庚申,第五個辛酉,辛金食神合正印,食神的力大過印的力,再行財的流年就財有力,身強財旺一定有好多搵錢機會。

辛金日主 癸水食神合戊土正印

辛金自己亦都鍾意表現,鍾意D靚的野,而食神就係發揮的橋樑,所以呢兩樣野加埋,呢個人就一定好識得表現﹐即係識得SALL自己,在任何環境之中都會令自己好突出。而印星就要將呢鍾性格壓低,尤其是戊土,戊土的特性係阻住水的郁動,有戊土正印合住癸水食神,呢個人唔慌會口齒伶俐得去邊,亦都唔識得在適當時間表現自己,現今之世唔可以樣樣都謙虛,唔可以樣樣都禮讓,而係要爭先,爭出位,如果唔在適當的時間去爭取,就會俾人踩住個頭上,無論在商場抑或在職場,都係一樣。

癸辛乙辛 
巳亥未酉

辛金未月,偏印當令,比肩透出,通根於酉,有偏財透出,以亥中甲木為根,有食神透出以亥為根,呢組命格日坐傷官,有食神透出,就自然係一個好醒目的人,在同輩之中好識表現自己,两歲上運,到廿二歲戊戌大運就有問題,有力的戊土正印合住癸水食神,由呢個運開始,腦筋無轉得咁快,最差就係零六年丙戌,啱啱要轉工,就自然頭頭碰著想黑。

癸水日主 乙木食神合庚金正印

水木相生代表有智慧,乙木食神有創意,包括咗有語言能力,學其他的語言好快,有D人在一個陌生地方好短時間就學識當地的語言,呢D人多數都係乙木食神有力,當然係因為佢係水日主的關係,有番咁上下聰明,但係呢種人唔多鍾意講野,同傷官格有明顯分別。庚金正印就剋合住乙木食神,而庚金正印的特點就係死板,唔鍾意轉舦,但係並唔係戊土的唔識轉彎,而係性格上的硬直,例如一諾千金,答應咗人地的事唔肯因應環境而食言,就源於金的五行本質,太平盛世就好得人尊敬,但係當世界立立亂的時候就好餂底,乙木食神係俾庚金合住的話,就無咗食神的優點,剩番金的缺點,最主要就係金有土生的機會多過木有水生,所以木的好野會消失。

乙癸甲庚
卯酉申戌

癸水申月,正印格,地支申酉戌西方金氣,有庚金正印透出,乙卯時柱有甲木透出,本命印重身輕,以比肩為用,乙同庚合,乙木的食神優點一定消失,代之而來的係庚金的缺點。

陰日干正官合日主

正官的特性就係對日主的管朿,在命格上面亦都代表咗事業,名氣,名譽,同埋地位,有適當的正官,亦都代表在一個機構,社團,一個組合,或者一班朋比之中有較高的地位,甚至乎在一個地方裡面的管理階層,就係以前所講的官老爺。但係官星係十神之中較為特別的一鍾,原則上並無負面的作用,唔同傷官,正面負面相差好遠,令到日主的性格完全唔同,正官的好與壞決定日主的能力,有用的正官會令日主的處事能力好有條理,好公正,周圍的人對你好尊敬,包括真正的官在內。無用的官星就會令到日主工作能力差,無牙力,講野無人聽。一般人對官星的理解就係命中官星有力,就可以做官,有領導能力,就可光宗耀祖,所以以前的父母教仔女一開口就話︰萬般皆下品,唯有讀書高(讀書的目的就係為咗做官),自然可以做官。一般認為身強官旺就自然有較高的社會地位,但係官星無論旺與弱背後都要有財星支持,如果無財星,官星就孤立,日主的性格就變成孤獨,處事畏縮,無膽,遇到一般傷官旺的人,就會俾對方食住,可以講係(撳住打)因為官星的特性係木納,唔識應變,亦都無急才,唔單止(嗌交)唔得,連一般的辯論都木過人,所以命中見到官星,唔好開心住,重要睇有冇財星生官星。呢度所講的官合日主,大部份都唔會化咗另一樣野,就會將本身的力量轉化於日主身上,所以話情向日主,因為官星一般都作為有力的人,所以就會對日主產生一個利好的作用,呢鍾利好係保護性,唔係壓制性。

乙木日主 庚金官星合日主

一組命格必定分陽日主或陰日主,可以同日主相合的就只有兩鍾,第一鍾就係陽日主正財來相合,另一鍾就係陰日主官星來相合,無論係邊一鍾,首先就要分辨日主的強弱,日主有力的命,來相合的一定對自己有利,日主無力而相合的就一定對自己有害,就係一般攞著數。乙木日主有力,庚金官星來相合,就會令到日主的性格好公正,俾庚金的特性影響日主,而日主有力,亦都會出現有力的人在自己身邊,身強官星合日主,就係以前所講的往來無白丁,所識的人都有番咁上下。身弱庚金官星合日主,就會樣樣都俾人制肘,同時自己的性格亦都容易得罪人,人緣唔好,因為庚金的負面野必定影響到乙木日主。

庚乙丁己
辰亥卯未

乙木卯月,地支亥卯未木局,身強有偏財透出,通根於辰,庚金正官透出,但無根,只靠財星生官,官合日主,官星對日主無管朿之力,反而成為日主的炫耀之物,即係官星俾日主利用,而庚金的負面作用影響到日主。例如自大,剛愎自用,不會顧其他人的感受。

甲乙甲庚
申亥申申

身弱,官合日主,樣樣受制於人。

丁火日主 壬水官星合日主

壬水的特性係開放,樂觀,而丁火就鍾意將一般的事收埋在心裡面。唔會隨便向人表露,丁火身強壬水官星相合,就會有壬水正面的影響,性格會比較開朗,唔會斤斤計較小節上的事,亦都容易接受其他人的意見。丁火日主身弱而俾強大的壬水官星合住,就會俾壬水的負面野影響到自己,例如做野唔夠積極,有頭無尾,亦都無自主能力,唔單止壬水官星的衰野有晒,重連丁火的優點都無埋。(丁火的優點就係外柔內剛,忍耐力好) 。

丙丁壬己
午丑申酉

丁火申月,正財格,酉丑半合金局,日坐食神,丁火日主以時柱丙午幫身,屬於財強身旺之命,壬水官星合日主,但壬水官星無帶俾日主好的野,因為官星只靠財生,而日主直接有根,所以官星合日主就無產生應有的作用,如果係女命,有異性出現,甚至乎結婚,如果係男命,就會升職,最少都會遇到貴人。

庚丁辛壬
子巳亥寅

丁火亥月,正官格,有正官透出,子時幫官,正偏財透出無根,日坐劫財,身弱,官強,正官合日主,日主合官,正官的優點加到日主身上,例如性格開朗,正派,規矩等等。

己土日主 甲木正官合日主

甲木正官的特性係公正不柯,永遠唔會滿足於現狀,亦即係有鬥心。但係當甲木正官變成負面的時候,就唔識轉彎,過於死板,加上己土受剋,就會偏向於消沉,由於係陰日主的關係,唔容易開口向朋友或親人救助,所以會遇難越難,好難自己走出困局。

甲己壬丁
子亥寅丑

己土寅月,正官格,有甲木透出,寅亥合木,日坐正財,有壬水透出,身弱,以丑土為根,以丁火生土為用,強官合日主,同時又係寒土,性格偏向於保守,樣樣忍得就忍,肯定唔會主動去爭取任何野。

戊己甲辛
辰巳午未

己土午月,有劫透出,地支辰巳午未,一片火炎土燥,甲木正官透出無根,官合日主,但係官的力俾其他野消耗盡,無財生官,所以官合日的作用發揮唔到,正官的特性影響唔到日主,呢個人無甲木官星的正直,亦無領導能力,更加唔鍾意守規矩。因為日主的力大過官星的力,就會令到官星的影響力消失。

辛金日主:丙火正官合日主,辛金的性格係鍾意表現又要面,鍾意其他人對自己的注意。丙火正官公正不柯,亦有愛心,有部份同辛金好相似,例如鍾意表現,亦都希望其他人對自己的注意,兩樣野加埋一齊,如果配合得好,一定係一個好叻的人,因為其他日主同官星的性質係相剋的,相壓迫,但係丙火同辛金係特別有情,同其他的木火土金的相剋好唔同,只有丙火先至對所剋的財係有情。

天干沖尅之官煞沖日主

十神之中生尅循環不息,在所有命格之中約廿六萬二千,九成都係身弱的多,弱就最怕沖尅,沖尅日主的不離官煞,正官同日主的關係,主要係對日主的管制,教導,但日主弱而官強,官星就變成忌神,就唔係管制而係壓制,唔係教導而係過份約束,所以官強日主弱的命,多數都唔可以放手做自己想做的事,唔單止唔可以搵錢,重會無端端使埋無謂錢,充份顯示出日主不善理財,唔單止事業無成,想剩番個錢都好難,因為官星為忌的時候必定會將財星泄弱,甚或消耗財星。

正官除咗係尅日主之外,都會幫日主的,當日主身強,正官係用神的話,就需要財生官,性格正直,做事循序漸進,唔鍾意花巧,有領導能力,決斷力強,但亦偏向於刻板,唔識轉彎,凡身強官旺的人,多數都有較高的職位,如果又有財生官,就一定有番咁上下財富。

官星有幾種,土日主以木為正官,呢種人正直而仁慈,識得處理人際關係,有管理能力。 金日主以火為正官,呢種人性格強硬,有路見不平抜刀相助的性格,有威勢,適合司法行業,可以做官,就算做管理員都叻過人。

水日主以土為正官的人性格較為溫和,亦都有適應能力,容易與不同性格的人合作,適合文職工作,例如文化,宗教,或者教書。

木日主以金為正官,呢D人處事果斷,有經濟觀念,亦都係一個有義氣的人,適合紀律性工作。

火日主以水為正官,性格較為溫和,有智謀,可適合不同的環境,亦可以從事公關的工作。

剋日主的唔單止係正官,仲有一樣比正官更具殺傷力的十神,就係偏官,基於偏官對日土係不留情的壓制,壓迫,所以一般稱做煞,而同所剋的日主啱啱隔七位,所以又叫做七煞,七煞同正官有好大唔同,七剋代表權威,有魄力,做野唔服輸,有自制能力,唔行運的時候,有苦行僧的堅忍能力,例如將生活程度降到好低,一個飯盒可以分兩日食,就算係因自己的錯誤而致捱苦都永無後悔,早知乜乜,早知物物,呢D後悔的口吻永遠唔會在呢D人口中出現。

當行運的時候,真係意氣風發,行衰運的時候所積埋D怨氣就會爆發出來,以前得罪佢的人,肯定無好日子過,即係呢D人有好強的報復心,係基於七煞格的特性,本來就無惻隱之心,如果有心報復,就一定係非凡手段。

七煞格的人要爭取一樣野,好少用和平手段,因為性格偏激,形成做野講速度,只係講完成一件事而唔會計較用乜野方法。七煞格的人有無七煞透出都唔緊要,最緊要就係唔好日坐食神。身旺的命七煞天透地藏就已經夠,有多過一個七剋透出,就變成攻身太過,由適當的約束變成過份壓迫,如果身弱的命,煞強身弱就一定要有印星化煞生身,煞印相生,必定係一個領導者,可以從事武職,必定好快就會升到自己認為滿意的職位。

如果正官同七煞一齊透出天干,就要睇地支的力相唔相應,天干的官煞都無力的話,男人就會變成決斷力唔夠強,而女人就意志較為薄弱。

癸丙戊庚
巳申子子

丙火子月,正官當令,有正官透出,日坐偏財有偏財透出,日主以時柱巳火為根,子辰半會水局,巳申合水,丙火日主真正係身弱,無制財星的力,亦都無話事權,本命財生官,官星的力大到非日主所能夠抵抗,日主已經無自主能力,所以官星的負面野都會出晒,本命五行欠木,即係欠印星,印星可以化官煞,行寅運同卯運的時候,就可以泄去官星的力,即係有貴人幫助,但係本命的貴人無乜力,因為所行的運係庚寅,辛卯,蓋頭運。

庚癸戊庚
申未子子

癸水子月,庚申時,子申半會水局,身強之命,戊土正官透出,通根於未,官星合日主,亦都係官星情向日主,由於日主有力的關係,官星掉翻轉頭幫日主,令到日主有地位,可惜命中無財,官星無源頭,所以呢個人的職位高極都有限。

丁己己己
卯丑巳巳

己土巳月一片火土,身旺之命,只得卯木七煞,乙木雖然係專氣,但係獨煞無透出,更加無財星生煞,所以呢組命係身旺煞弱,女命以官煞為夫,無正官就以七煞為夫星,七煞無背景,無氣勢,可以想像呢個老公,有七煞負面的特質,無七煞的正面野,例如暴燥,花心而無鬥心。

己丙己辛
亥午亥亥

丙火亥月,七煞當令,有正財透出,有生煞之名而無生煞之力,日坐劫財,一般所謂陽刃幫身,有兩食神透出以午為根,日主有力,但午火劫財俾有力的亥水七煞合住,變成幫身無力,七煞直接攻尅日主,食神己土可以制煞,但係己土的根俾強的亥水合住,煞強身弱之命。日主完全俾七煞控制,現實生活裡面,呢D人的性格自以為好叻,但係當有突發性的事就手足無措。

正偏印制食傷

算命的人都會有偏見,正印被視為正派的十神之一,而正印所制的係傷官,換言之傷官俾正印所尅,可想而知傷官梗唔係好東西,所以一般的人就將所有衰的野都俾晒傷官,例如傷官格的人鍾意攪事,無事生事,小事化大事,事無大小,都要參與,要俾人知道自己無一樣野唔識,樣樣要叻過人,任何人有小小把柄俾佢執住,就即刻咬住唔放,直至玩死為止,所以傷官格乞人憎的原因。

但係正印就唔同,正印係寛大為懷,無事唔會攪事,大事化小事,將複雜事情簡單化,一個傷官格的人,在一間公司裡面個個都俾佢玩殘,但係遇到一個正印有力的人,通常都俾人覺得無咁醒目,鈍D,無乜急才,嗌交就一定輸的,但係有佢的優點,就係有容人之量,唔貪心,唔會直接指出其他人的錯處,所以人緣都好D,傷官格的人遇到正印格的人真係遇到天敵,先天性尅星,用到搬弄事非,抺黑等等手段都未必可以傷害到正印格的人,但係正印格有一樣蝕底的就係無殺傷力。

傷官被視為攪攪震的人,所以傷官格被視為負面,相對食神就被視為褔神,因為食神格的人唔會爭先恐後,有一種從容的性格,同其他人合作做成一件事亦都唔會爭排名次,唔會爭住領功,食神格或者食神有力的人有一個特點,就係笑容多D,所到的地方都會受人歡迎,而呢D人多數都有番一技之長,或者係專業人士,例如喬布斯。一般的研究,鐘意食野的人,都會比唔鐘意食野的人開心D,而食神有力的人,佔咗八成以上都係鐘意食野,亦都好識得欣賞好的食物,所以食神有力的人俾人覺得開心,而亦都會感染到其他人。

食神會俾偏印尅制,偏印同正印有所唔同,無正印的量度,最大的缺點就係鍾意挑撥是非,鐘意不勞而獲,所以偏印有另一個名叫(梟),叫得做梟印,就自然在命格上係負面的野,梟係一種陰濕的雀仔,專係掠奪其他雀鳥的成果,所以當食神係命中的用神的時候,俾偏印尅制住,就叫做梟印奪食,表示呢個人的性格會周圍去揾着數,會利用A君打擊B君,又例如在A君面前中傷B君,同樣在B君面前數A君的不是,從而攪到周圍的人大家互相猜忌。

食神格的人比較善良的,好多時都係集中精神去研究自己鐘意的野,而呢D野未必係有實質用途的,所以食神旺甚至過籠的話,就好多時會發白日夢,浪費時間金錢,有呢種命格就需要有偏印制食神,就唔叫梟印奪食。

丁甲甲丙
卯午午辰

甲木午月傷官格,日坐傷官,有食神傷官透出,食傷混雜,有比劫生食傷,偏財靠傷官生旺,日主有力,傷官當令,無印制傷官,呢個人做野快手快脚,唔忍得手脚慢的,腦筋遲鈍的人,但係講野不留情面。

丁甲庚丙
卯子子辰

甲木子月,正印格,日坐正印,有七煞生印,但七煞無根,食傷透出無根,子辰合水,甲木以卯為根,成個係印制食傷格。呢個人做野有系統性,邊樣先邊樣後,分得好清楚,好唔鐘意有其他野突然加入,打亂計劃就會手足無措。

辛己庚甲
未丑午午

己土午月,偏印格,午未六合化火,有甲午年柱幫身,辛金食神透出,庚金傷官幫食神,但兩樣都無根,食神俾偏印尅死,呢個人處事一定唔公正,無量度,官星俾偏印泄盡。

壬甲甲丙
申寅午午

甲木午月傷官格,年柱傷官,日坐專祿,寅午半合火局,寅申沖,時柱七煞不足以沖動夫妻宫,有壬水偏印透出,比肩幫身,有丙火食神透出,以寅午為根,呢組命一定以煞生印為用神,偏印唔係忌神,所以食神為忌,傷官作為食神的根,呢個人一定持才傲物,得理不饒人,壬水偏印不足以制食神,無理想,無抱負(食神制煞),而財星藏於餘氣,對錢好緊張,(食神生財破印)。

比肩尅正偏財

比肩即係同輩,比肩作用係分日主的財,代替日主承受官煞的壓力,泄偏印的力,代替日主生旺食傷,比肩係用神的時候,可幫日主制財星,敵官煞,性格亦都正派,處事公正,唔會受印星左右(唔會左搖右擺)。

比肩係忌神的時候,就會令日主使好多無謂的錢,但會花得開心,起碼當時覺得開心。又會對長輩唔尊敬,連起碼的關心都無,亦無乜慈悲心。有熱切追求權力的慾望,最忌與人合作,尤其是有錢銀的合作,一定嗌交收塲。

比肩劫財兩樣野都係取日主的錢,所以財星最忌就係見到比劫,尤其是係身强財弱,原局有比肩劫財就注定揾錢辛苦,性格上對錢亦都較為緊張,如果係財强身弱,就需要比劫分散財星的力。

影響日主的首先就係比劫,比肩多的人一生必會使好多無謂錢,但係使錢的過程係好開心的,例如買自己的心頭好,但係買咗係無用的,或者名譽上的花費,有虛名而無實質的利益,甚至乎被視為老襯,例如捐錢中國救災等等。

劫財多的人同樣會使好多無謂錢,但係過程就與比肩大不相同,係越用越唔開心,但係命運迫住你要用。例如有一班厚顏無恥的親戚,不斷伸手,如果係()就話可以拒絕,但如果係()就無得拒絕,一路唔開心就一路要使,如果係身强財旺當然無所謂。

但係命運就專同人作對,如係身强財旺,就自然有一班有錢的親朋戚友,自然無劫財或分財的現象,六親都咁有錢,往來無白丁,點會有人伸手呢,就算要使錢,一定係對名譽或地位有幫助的花費,基本上都唔會有冤枉錢用的。

但係財係養命之源,財亦都係動力,財亦都係膽量,命中無財就講乜都無用,真正係寸步難行,現在生活就係有錢就有面,有錢就有權。命中有財,呢個人的活動性都會好D,唔會成日匿埋,性格都樂觀D。有句說話叫做財壯人膽,命中有財就膽量都大D,唔會遇少少困難就謝晒,當然要有呢種正面的性格,財星在命格上一定要係用神,或者財星得用。

如果財為忌,或者財星欠缺,就無咗財星的正面作用,而財亦分正財同偏財,正財代表安份而得,同埋預先可知多少或者幾時會得到,等於返工何時出糧,有幾多都係一早知道的,所以可以預先(支配),正財越有力呢個人就越有長遠的計劃,有D人可以用三十年去供一層樓,唔使講一定係正財有力,所以會有長遠的計劃。

如果偏財有力的人,性格上樣樣都要快,速成,今日做野明日就要有收成,唔會花幾十年去做一樣野,就形成偏財旺的人做野好快,効率好好。如果比肩多,偏財就自然受尅,所以比肩過籠的人做野一定較為(滋油),對想揾快錢的人好唔鐘意,所交往的都係較為踏實的人,花FIT跳脫的人好少同佢傾得埋。劫財旺的人一定鐘意揾快錢,投機,鐘意行險僥倖,俾人覺得好醒目,腦筋好快。

庚壬癸丙
子午巳辰

壬水巳月偏財格,有丙火偏財透出,日坐正財,子辰會水,有金生水,偏財當令,日主有力,是為財强身旺,日主有力就可以控制財星,所以呢組命就得到偏財的特性,對金錢的意識同一般人唔同。

戊丁癸丙
申巳巳辰

丁火巳月劫財當令,有劫財透出,時柱正財,劫財强就自然係制死正財,正財的作用就發揮唔到,身强財弱,所强的係劫財,命途中只要有財出現就自然有一班所謂老友或者戚劫晒你D錢。

庚丙癸丙
寅戌巳辰

丙火巳月,有丙火透出,地支一片火土,庚金偏財伶仃,身强財弱,有食神生偏財但係偏財無根,不足以承接印星的力,無晒偏財的特性。

正偏財破印

印星係代表文化,代表斯文,代表智慧,代表別人關懷自己,亦代表自己對別人的關心,更加代表貴人。如果配合官星就代表權力的行使,當官星尅制日主的運或者流年,而有印星出現,或者原局官星尅日主而運或流年遇印星就自然可以化解壓力,如果身旺官强,就會好想話事(權力慾),有指揮權,但真正行使到權力就需要印星出現,官的力要以印星才可以行使。

但有財星出現就會制住印星,令到日主話唔到事,財星破印就係無話事權,女命比較簡單,財生官,官生印,但當官星唔需要財星的力,財就自然轉尅印星,就會令自己的工作有阻滯,或者有()不行(無牙力)。

男命就比較複雜,除咗話事權有阻之外,最明顯就係家中婆媳不和,夾在中間,又話唔到事,另一樣就係財星的力大過自己的力,就會令自己做野無主動權,因為印星係官星所生的,當印星被尅,就會令自己的地位受損,因為印又係家庭,所以容易家嘈屋閉。原因多數都係因為偏財破印,偏財代表其他女人,所以日主唔夠强,就唔好招惹咁多偏財。

壬戊丙壬
子辰午子

戊土午月,正印格,有偏印透出,年時兩柱都係財星,日坐專祿,地支子辰會水,子午沖,財星旺而有力,又半會三合局,印星當令,財星有力尅制印星,命中無官星,所以財星的力盡尅印星,自然係家無寧日。

戊甲壬壬
辰午子子

甲木子月,年月壬子强印,日坐傷官,財星透出,子辰會水,印星的力大於一切,呢度就係水多木飄,戊土財星不足以制印,反而有水多土流之象,午火被俾强水所沖,呢個人惰性强又無膽,妻宫為用神,但無實力。

戊庚乙壬
寅戌巳子

庚金巳月,七煞當令,正財透出通根於寅,日坐偏印,有偏印透出,年柱食傷可以講係財印相當,以官星作為橋樑,可惜日主無根,無能力控制財星,亦承接唔到印星生身,仲俾年柱食傷泄弱,呢個人表面上樣樣都有,但實際樣樣都掌握唔到。

印生比劫

比劫係同日主同一樣,印星生日主即係生比劫,一般身弱就需要印星幫身,有印星出現,即係有貴人,亦都代表有意欲去學野,例如身弱,第一個運行財,第二三個運行官,第四五個運先至行印,呢種命格就表示青少年與父母無緣份,包括咗父母的運氣唔好,俾唔到足够的野佢。如果第二三個運行官煞,身弱行官煞即係身弱見鬼,前三個運就顯示咗佢少年無書讀,兼夾做野辛苦過人,第四個運或第五個運就自然行印運,就自然想返學,但係所學的野一定唔係系統性的學問,而係一般的雜項,例如睇相算命等等。

呢度的印生比劫重有另一種意思,就係身旺或者身强遇印,呢種情況就需要比肩劫財代日主化印星的力。如果身强地支一片比劫,天干無比劫,再遇印星流年就會有病,如果天干有比劫透出,就可以化印星,日主就可避病魔之纒繞。

身強印旺欠財星:

庚癸癸癸
申丑亥亥

印強身弱欠食傷:

甲甲癸癸
子子亥亥

食傷生財

每一組八字都需要有財星,女命財星可以生官,男命財星尤其重要,財係養命之源,亦都係身邊的女人,命格裡面的財星唔可以單獨存在,因為財星係日主所控制的,如果單係身强財旺係唔夠的,財星一定要有源頭,就係食傷,命中淨係有財,即係一生人會有好多揾錢機會,但無食傷就變成只有機會而無能力,因為食傷係比劫力量的發揮,比劫的力以食傷表露出來,所表現的就係揾錢能力,所以原局有食傷生財,就表示呢個人一生有好多機會而又有能力把握到呢啲機會,所以命中有財而行食傷運,表示曾經錯失好多機會,呢次卒之可以抓住一個,就自然一發如雷。如果命中有食傷無財而再行到財運,表示呢個人好有才幹,但係無機會,行財運,就即係機會來啦要好好把握。

辛壬己乙
丑寅卯亥

壬水卯月傷官當令,有傷官透出,日坐食神,日主以亥為根,亥卯半合木局,身弱食傷强,正印透出無根,食傷就係忌神,呢個人個人做野只有自己而無為他人著想,因為印星無力制食傷。比劫俾食傷泄盡,食傷的負面作用表露晒出來。

癸壬丁乙
卯子亥亥

壬水亥月,日坐陽刃,有劫財透出,乙木傷官透出,通根於亥卯半合木局,身强傷官生財格,以食傷泄日主的旺氣,但財星無力,發揮唔到日主的才幹,呢個人如果行唔到財運,就只有一生奔波不停,勞而無功,付出同收入唔成正比。

辛甲戍乙
未戌寅亥

甲木寅月,寅亥六合化木,有乙木劫財透出,身强之命,有正偏財在地支,以偏財透出,財星有力,日主有控制財星之力,身强財旺,做野好勤力,但只係識埋頭苦幹,唔識得利用其他的力量,例如人際關係,因為命中食傷似有若無,只係用力唔識用腦。

丁甲壬乙
卯午午亥

甲木午月,傷官當令,日坐傷官,有傷官透出,財星弱,日主的力無傷官咁大,自然會受傷官牽制,可以財泄傷官的力,但財星好弱,不足以泄傷官的力,呢個人就成日都以為自己好叻,認為自己懷才不遇,不滿現實。

丁乙庚乙
丑未辰亥

乙木辰月正財當令,日坐偏財,日主比肩透出,以亥中甲木為根基,財强身弱,傷官自然唔係用神,女命第一個運係辛巳,跟住壬午,癸未都係傷官生財的運,傷官運就自然影響婚姻,第四個甲申大運就變成財生官運,如果在呢個運結婚,就自然會有好姻緣,但財強身弱的女命早婚的多。