丁酉流年

丁酉流年

庚壬壬丁
子戌寅酉

12 11 10 09 08 07 06 05 04 03 02 01












格局

丁酉年主體係壬水,生於寅月,有壬水比肩透出,以子水劫財為根,有庚金偏印透出,以酉金正印為根,寅木食神當時得令,無食神傷官透出,自坐戌土七煞,無官煞透出,立春位置在正月初七,寒氣仍盛,寒就自然要火,有丁火正財透出,以戌,寅中餘氣為根,壬水主體旺,金印星亦旺,丁火正財弱,生財的木食神亦弱,財弱自然無力生土官煞,所以官煞亦弱,本年格局五行齊,但格局寒,必以火為暖局之用,但火用神不得力,食神寅木被剋被泄,無力生丁火財星,原局財弱自然要追財,人追錢可想而知係辛苦的一年。

形態

壬水主體有根有印,分財者多,生財者少,原局有寅木食神,但寒木之力不足以生財,引伸為本年搵錢能力只屬一般,甚至乎無搵錢能力。本年並無正官出現。有的只係戌中七煞主氣,及寅中七煞餘氣,都不足以對抗當令寅中甲木食神,寅木不生財就自然轉向剋制七煞,食神同七煞係先天性對立,引伸為一般人都無所事事,好自然地就會同當權者對著幹,最主要係自坐七煞,對主體壬水直接攻剋,亦都係引致對當權者不滿的原因。比肩壬水合住丁火財星,一般人會好熱心搵錢,但財星被有力人士掌控,亦係令財星不活躍。

財可生官,但財星無力,表示一般人不可以有話語權。原局無正官,只有七煞,表示只有壓迫而無合理的教導。每個地方都係強者掌權,原局壬水有根有印,自己有力又有生水的金,表示當權者背景雄厚,亦都控制住財星。

財力

寅木係食神,丁火係財,食神可生財,即係要用自己的才幹搵錢,可想而知一定一般階層先至需要出盡法寶搵錢,但只有寒木食神,不足以生財,可推斷一般群眾搵錢不容易。丁火係弱的財星,引伸為市場無咁多錢供給咁多人去搵,局中只有正財而無偏財,表示創新的膽量不足,亦都表示搵錢的機會好少。正財係規矩或正常途徑所得的財,偏財係橫財或不可預料的財,現在偏財隱藏,要有特別狀況才可以出現突發之財,最常見就係社會有衝突,就會出現偏財,有搵快錢機會。

社會狀況

講社會現狀就一定係以官煞做標準,原局官煞無力,面對壬水群眾,實在不足以控制,所以管治能力只屬一般,但壬水生寅木,表示群眾的才幹足以與管治階層對抗,形成社會缺乏和諧,食神有能力制官煞,只係對著幹,不是制死,因為無傷官,缺乏圓滑手段,只知對抗,不知妥協,政治最高境界就係傾傾傾。因為本年的格局無傷官,亦無正官,管治階層不會用一種安撫手段,只有強權的壓迫,但壬水生甲木食神制官煞,陽生陽,完全無一點轉寰餘地,並無傷官的柔和手段,亦無傷官的奸詐面具。

管治階層只識用強硬手段,皆因戌土剋壬水,以七煞的無情對群眾的剋壓,雙方都缺乏了陰陽相生及陰陽相剋,以致愈弄愈僵。另一方面群眾與管治階層對著幹一定輸,原因係無陰陽相生的傷官,不懂得轉換面具,不懂得因應環境而改變方式,只知一味死衝,那會有好結果。

一般群眾在這一年亦都搵食艱難,因為只有食神生正財,而無傷官生偏財,這種形態只要失業就會手停口停,因為環境愈差就愈需要傷官式的周身刀,當這一把不足以應用時就拔過另一把,但現在只有食神而無傷官,即係唔識轉彎,亦都無多方面才能,正式係「單蹄馬」。

當社會大部份人都係食神生財,自然議價能力不高,亦產生另一個問題,就係缺乏安全感。好容易引致社會不安寧,其中以三月甲辰係最多問題,這個月天地相剋,自然有人要作反。適值這一年管理人要換班,一定會產生好多亂象,如果不幸由女性來做管理人就更加亂上加亂。講社會狀況就不離工作與住屋,工作必定係以財星為主,丁火正財被合,引伸為財星不活躍,亦可以講新的職位很少,同時財坐於酉金上面,可想而知財星無生氣「申中所藏係雜氣,酉中所藏係專氣」,加上火歸庫,財富歸入少數人之手,所以今年就業情況絕不樂觀,請不要隨便轉工。

社會狀況另一個大問題就係住屋,好多人都不知道本地住屋情況緊張到何等程度,我試圖忘記晒所見的低層次劏房(我的廁所比它更大),用一種冷莫的心態從這八個字之中找出今年本地的住屋狀況,本年原局土弱,只得戊土,並無己土,戊係高山燥土,八字圖像所表示出來的係又高又大仲要遠離人煙添,換句話講就係有一定程度的大,及有一定程度的好環境,這種屋今年屋價一定升完又升,因為戌中隱藏財星,有力人士座在上面,應該益唔到一般人。原局所無的係己土,己土係河邊濕土,可想而知環境一定差過人,不入本年格局之內,因為財星已經引入戌土之中,輪不到生旺己土。

另一個解釋就係寅中甲木無己土相合,寅中甲木食神係一般人的才幹,引伸為一般人就算好有才幹,都不能擁有一塊磚頭,所以居住問題今年無可能解決,即係樓價還可再升,買得起與否係另一回事。

人事狀況

丁酉年原局並無一種五行獨大,當令食神無力。七煞戊土只有微弱正財生助。丁火財星亦無自主能力。壬水主體最旺,但亦都無力。庚金印星在這裡可能係最高層次的五行,但亦無能力控制當時得令的食神,既然無一種五行可以獨大,即係無一言堂,自然互相爭奪話語權,可以想像係亂局一個,但混亂之中都可以理出一個頭緒。

最為大眾關心者莫過於誰是管理人,作為一個小人物,一個術數從業員,當然無可能預知誰是管理人,但一切都係有天數預定的,既然係一個術數從業員,都要大膽嘗試,在未有任何提示之前作一個馬前炮的預測,考驗一下自己,應驗與否不重要,起碼比放馬後炮好。

胡官第一個報名,係丁火辰月寅時,現行午運,官星被合被泄,應該無機會。

林鄭係乙木巳月辰時,現行辛運,天合地合化官煞,有機會。

財爺係辛金辰月午時現行乙運,財印對立,官星不足以通關,應該無機會。

葉劉係辛金申月申時,現行丁運,身強財旺生官,有機會。

前曾局長係丙火巳月丑時,現行戌運,食傷生財應該有機會,但佢係讀書人,我認為佢無機會。

未知還有其他人報名否,如果就這五個人競選的話,非常不幸地,三男二女之中,只有兩位女士有機會(純以命論命,不涉其他外力因素),所講不幸者,係本人不喜歡女人做管理人。

本年格局並無突出的五行,所以人事頗為複雜,財又弱,官星又無力,做成有爭鬥。但要知道那幾個月較好亦都有迹可尋,由正月壬寅至十二月癸丑,除三月甲辰十二月癸丑係天地相剋之外,其他都係相生或相比的月份,如果單論財,丙午及丁未兩個月,大部份人都可以搵到錢,而權力爭奪亦集中在丁未月,所以火旺之月就會產生動盪,因為財主動,會有好多不穩定因素,愈多動象就愈多人搵到錢,或者好多搵錢機會。除却丙午月,丁未月及甲辰月之外,其餘月份都係平安及平淡之月。

本文只對一針之地有效,對應其他地方絕對不準。

丁酉流年方位

元旦盤

元旦盤

運星盤

運星盤

年星盤

年星盤

丁酉流年處於八運之中,所以受八運的影響,而八運又受元旦盤所影響,元旦盤對丁酉流年有先天性的影響力,風水的標準形格就相生相合,相生就一定係先天生後天,尤如長輩幫後輩,至於後天生先天就產生不到作用,元旦盤要產生作用亦要有先決條件。相生就係最簡單的五行相生,有相生自然有相剋,但好奇怪的先天剋後天就會有凶象。相合就較為複雜,有生成成數相合,而合十就較為直接。很多時會遇到不如意事,但不知什麼原因,以及剋應在什麼宮位,多數都係由於元旦盤的先天性格局與後天流年相剋,而運星盤未能將之化解,在這種位置上工作或起居一定頭頭碰著黑,如果在生成數宮位做事,就會順利得多,亦可以化解先後天相剋的凶象,最大作用就係化解是非,無論係凶星合抑或吉星合都有相同的作用。宮位的好壞亦不可以單靠星組來決定,外圍環境其實佔了最大比重,但一般人都會忽略,為何會忽略了外圍環境呢?最主要就係一般的流年書刊,只係話俾你知某一星飛到某宫位,就會如何如何,例如二克飛臨你的房間,這一年你一定會有大病,就要擺乜掛物來化解等等。

元旦盤係五黃星進入中宫,五黃的五行屬土,係不動的土,係老土,所以五黃係不喜歡動的,逢有動象就不得安寧,演變成五黃動,必定周身痛。五黃位置係永遠不變的,相對應的就係運星盤,運星盤就每二十年輪轉一次,現在時值下元八運,八白星入中主事,八白的五行亦屬土,但八白係有動象的,屬年青的土,所以同樣是土,八白就不忌動,另一個解釋就係當運之星,主宰這二十年的五行生剋制化,而八白與五黃同樣係土,運星與元旦盤並無衝突,所以在八運的二十年內不會有大型變動。

中國自稱中土,所以最忌動,同時逢剋制五黃的地運都會產生不如意事,再加上方位,就可以大約推算出發生什麼事。流年則每十二年輪轉一次,每一流年都有一組五行入中主事,現年值一白入中,一白五行屬水,運星八白土,自然剋制一白水,所以這一年一定受制於八白,八白的主事方位係東北方,所以壓力一定來自丑艮方,丑艮都係寒冷之方,而一白就係子癸之方,寒土剋寒水,本地由七運的後半段開始,已經缺乏了一個明確的地標,八運在本地的主事方位係飛鵝山,但無人可以講出本地的地標,你認為係金紫荊廣場,他認為係圓方等等,就自然產生各據山頭的勢態,互不統屬,甚至乎對著幹,亦都關乎本地再無大型屋邨,有的只不過係一枝枝的牙簽樓,高而單薄,完全無一種穩重霸氣的型態,自然會產生出一班無份量又要出風頭的人,可從他們出身的地域就可以測知他們的料子有多少,個人認為不必對他們追打,漫駡,只不過係因應地運而產生的小人物。本年一白入中分佈八個方位,而每一個方位都會與八運的八個方位互相對應,而產生後天的剋應,所產生的吉凶禍福亦要因應外圍環境,再對應住宅中飛臨的位置,係大門,走廊,廳堂,睡房,書房,廚房,廁所等等,而吉凶各有不同。

世間事係永無公平的,不論命理或風水,命理著重於先天性,風水則著重於後天環境,屋外形格有著決定性的作用,而一般的凶象好大部份都係自己做成的,由於人的惰性,加上本地人的鬥心不強,自然無自主能力。

今年本地最好的方位係正北方,最有優勢的方位,六白星到,與運星四綠相合為土,引伸為本地北方的土地最有價,另外與元旦盤合生成數,代表靈活,所以一定要有動象才可應驗吉兆,最容易出現的就係搵到自己滿意的工作或職位,家中位置最好就係廳堂或飯廳,一家人一齊食飯,一家人聚會休息地方,最好就係一齊睇電視,互相傾談就自然家庭和洽,財氣亦旺,但只限於某一類人,就係男性,偏向於父親輩份,這個方位對女性的益處不大。最差就係座落於睡房,因為動靜顛倒,睡房係靜態的地方,動星飛到,自然睡不安寧,引致精神欠佳,做事自然不順利。如果覺得有問題,就可在床邊放一塊黃色地毯,以減少動象。

搵財位就一定係正東方,當時得令八白星飛到,一般人都作為財位,加上運星六白,八六到一定係主有財,與元旦盤組成生成數宮位但這個宮位的星組都係應在成年男人身上。但好可惜方位同流年對沖,酉年卯方位,財星到就要有動象,但係歲破方就最忌有動象,所以要小心處理。財位最好就係大門口,動象大就會財氣旺,但歲破就容易有交通意外,每當有特別收入時就會有意外跟隨,係一個禍福相隨的宮位,所以每當有財星出現之後就必定要打醒十二分精神,十天之內都要小心,正東八白宮位最差就係莫過於座落廁所,真係神仙難救,唯一可以做的就只有保持廁所清潔,不要有異味,抽氣扇長開,稍減凶象,切忌多雜物。

正南係今年最衰的宮位,五黃到位,一般都作為凶象,五黃除了產生凶事之外,同時亦都係權力的象徵,只適宜在睡房,因為今年被運星三碧剋到正,會有被下屬奪權現象,甚或失去話語權,最差者就係飛臨大門位置,或任何位置望見動土工程,小動小凶,大動大凶,總之不能避免,化解之法可以講係無的,只有希望動土工程快快完工,如果一定要做點什麼的話,唯有用最原始的方法,掛風鈴,一定要六層或六枝銅棒,切忌五層或五枝銅棒,否則不掛好過掛,如果落在老人家房間,這一年必定凶多吉少,要知道會否出現凶象,可睇性格有否變得頑固,如果覺得真係明顯性格大變,即係應數,都要搬出為上。

正西三碧星係今年的是非位,運星一白生旺三碧,更容易招惹不必要麻煩,同時亦有僥倖之心,會產生賭博行為,或者會沉迷一樣事物,如果真係對某一樣事物著迷,就好難退回原位,元旦盤加運星盤係七一,表示周身癮,又有桃花,對這個宮位又剋又合又生旺,自然好多嗜好,慣性都係壞的嗜好多,肯定不會係讀書讀上癮,最差就係飛臨廚房,因為廚房係女人專用的地方,這個宮位所有凶象都係由七赤而來,如果眼平線望見的地方有火警甚或火燒山事件出現,就好難避免女人會招惹麻煩,要化解就只有去行山,或穿著紅色衣物,如果不喜歡行山,可在自己佔用位置放紅色地毯。

西北二黑病符到位,有運星九紫生旺,元旦盤影響力不大,病符星最忌到廚房,因為二黑係女主人星,而廚房係代表一家之煮,所以二黑到廚房,女主人想唔病都好難,如果好彩真係無病,在下半年都會產生負面情緒,無端端都會大發一輪脾氣,基本上都無得化解,只管放一個上鍊時辰鍾,但要準確報時才可,否則變成大聲夾無準,反而會令女人染上不良嗜好。

東北四綠文昌飛到,運星二黑,元旦盤八白,有相剋無相生,文昌星通常都作為利考試,進修等等,但當所到宮位並無讀書人,就會轉向產生桃花,未結婚有桃花出現自然係好事,但四綠所到宮位係不會理會位置內的人結婚與否,只要不在學的,自然會出現桃花之事,要看位置所在的人身份如何,才會產生吉凶,最大忌就係東北方有火燒山意外事件,有讀書人的就會考試落第,不在學的就會有桃花劫,完全不好玩,位置最好就係書房或書枱。

東南九紫星到,與運星組成九七,元旦盤四綠,全部都係陰星,如果座落睡房,就會相應男主人會出外冶遊,如果座落大廳就會有喜慶事出現,但要一家人一齊食飯才會出現,如果一年都無幾日一家人一齊食飯的就好難應出喜事,如果產生野桃花,就可在本宮位養魚,如果係睡房就無得救,因為無可能在睡房養魚,就算假魚不可以。

西南七赤是非星到,運星盤五黃,元旦盤二黑,七赤本身已經係凶星,齊集二五,生旺七赤,最容易就係病從口入,禍從口出,無論食同講都要小心,最常見應驗在少女身上,會口舌招尤,得罪人多,最差就係座落大廳,會令一家人失去和洽之象,如果發覺一家人口角不停,就可在西南方養一缸黑色魚。

要催旺吉星所到宮位,或化解凶星所到宮位,要因應外圍環境才可作出準確判斷。