相學口述篇
呢篇係我教相學的講稿，行文完全口語化，可以就咁照住黎講，歡迎複製，甚至據為己有都冇問題，目的只係要推廣五術。
頭長而方富貴久長，頭長而圓衣祿綿綿。
頭部長而方，長而圓、並唔係淨止長帶方，長而帶圓，重包括前額、頂門、後枕、側腦四個部份，有呢四個部份而又飽滿的，富貴長久，絕不出奇，例如林肯，頭長而圓就缺乏咗腦門，所以無貴。
頭短而圓終有衣祿，頭短而扁困頓難免。
短而圓就係缺乏頭頂腦門，可以有富，但係無貴，頭頂唔夠飽滿，求貴始絡差啲，扁即係無後尾枕，無枕骨就蝕底，平晒的，四十歲後就好有問題，就要耳後有骨就可避免事業破敗。
頭若扁生早歲迍邅，頭若偏生中年破敗。
扁生即係最重要嗰四個部份，唔夠飽滿，呢度話早歲彖煎，就一定係前額凹陷。偏生即係斜、歪、呢度話中年破敗，即係左右顴骨有高低，要去到敗就一定係高低或者大細面好明顯。
頭有兩角必有官祿，頭有四角其貴非常。
書上面多數話頭，其實應該係額先至啱，兩角即係日月角，日月角起並唔係真係有兩隻角，而係日月角部位飽滿，好似亞松，但係如果露骨就刑尅父母，頭有四角即係日月角加輔角，亦即係包括埋官祿位同埋印堂，就一定有啲權力。
頭大無角不是粗人便是木作。
頭大，係講過大，圓周應該係２４吋，女人就２２吋，過大過細都係唔好，粗人即係體力勞動，木作即係手藝，以前的觀念除咗靠老婆賣首飾供佢讀書就係最好之外，其他自己搵錢讀書都係低級啲。
有日月角骨無輔骨者，有輔骨無日月角骨者。
有日月角骨即天庭位飽滿，但額部左右瀉，形碩凸，如果中線飽滿，則少年得志，但係以後點樣就唔知，但多數都起落好大，有輔骨而無日月角骨即天庭位破，但仍然係有前途的。
無日月角骨與輔骨僅得額圓者，有日月角骨輔者。
額圓者多數係商人，因為額無輔角表示配偶父母對你無助力，無日月角父母無助力，最有可能就係白手興家。有日月角而又有輔骨，出身家庭一定有番咁上下。
有邊地骨無日月角骨輔骨者，邊地骨日月角骨輔骨皆起者。
邊地即額邊有骨即額廣濶，雖然唔飽滿，但勝在人聰明，諗野快，有邊地骨而又有日月角更加埋輔骨，即係話呢個人１８歲就開始行運，要氣長久就一定要加上後枕骨夠厚，如果淨係有前無後，只係一陣風光。
頭方頂高居尊天子，額方頂起輔弼良臣。
頭方要夠長，包括前後左右骨要厚，加上頂門，即係天靈蓋高，主事業長久，額方即係額如壁立，有分辨是非能力，亦夠忠心。
頭大碩闊王侯相，虎頭燕頷封博望。
博望侯係張騫出使西域的封號，額開闊好似把扇就叫虎頭，頦即係下巴，頤即係腮幫，下巴豐滿同頤相連叫燕頷，有呢Ｄ形格想無福都難。
頭長面長衣祿相當，頭短面長覓食他鄉。
頭長即係厚，頭厚面長即係成個頭好飽滿，一定出生於良好環境，頭短即係薄，後尾枕骨薄就一定早出離家搵食。
頂平頭圓額又方早歲姓名揚，腦後橫生頂又平官祿倍增榮。
頂平唔平唔緊要，額方圓即係天庭飽滿，得父蔭，好後生就有名氣，但係要長久保持就要腦後橫生，即係後尾枕骨要厚，未見過無後尾枕骨的人到中晚年仍然富有的。
頂骨連鼻文拜相，脊骨連枕武封侯；頭圓頂方還多福，頭尖頸細憂貧。
有個名好好聽的，叫做伏犀貫頂，呢個人就算未讀過書，都可以出人頭地。就好似老虎咁威猛，所以投身武職就一定升官快。思想快捷長遠，一定樣樣好啲，頭尖就一定無計劃，頸細身体差，睇醫生都睇晒Ｄ錢。
腦削額塌庸俗子，頂尖額窄不為官；頭小額小多無祿，有頭無頸二十亡。
腦削思慮唔夠週密，額塌想Ｄ野好無謂，志大材疏，何止不為官，就算做平民都好辛苦。頭尖額窄唔單止無祿，簡直生活都有困難。有頭無頸係話頸短，頭大而頸短一定多病，二十死就未必。
腦塌額窄人急燥，頂尖額塌性輕浮；額窄頭大夫妻必礙，額突腦潰早剋中敗。
腦塌係後腦扁，加上額上多茸毛，就小小野都唔忍得。頭頂高聳想野好快，額塌即係即係一路斜上去，呢啲人做野好唔穩陣。額上寒毛多就形成窄，後枕骨凸表示性慾旺盛，如果兩個都係咁橫就無問題，但係有一方面唔係的就有麻煩，額凸後枕凹，中年小心。
頭偏額窄難言福壽，根低梁塌定主財空。
頭形生得唔正，就好難會有一個好額，福就肯定無，壽就未必，因為有無壽亦睇頦宮，頤位先至可以決定。鼻為財星，塌即係鼻樑有節，中年有問題，根底即係山根低，４１歲後就當有一劫。
天庭骨隆起，眉隨骨起，佐串骨角起，鼻骨芽起。
天庭骨包括日月角，輔角開闊，起即係飽滿，官祿宮高就容易身居高位。呢個起唔係凸起，係有骨而隱伏，太凸呢人追求啲野未必用正當的手段。佐串骨即係左右塚墓，有小小拱就叫起，就算額形唔靚，到廿六七歲都有運行。芽起者，山根圓，準頭圓，就算唔大貴，都會有好多貴人相助。山根窄小，氣量淺，如山根欺眉骨，女主刑尅。
顴骨平平起，太陽穴線起，頸骨平闊起。
顴骨唔夠高，表示成敗都好快，或者有顴無面，即係顴高面珠凹，呢個人就寡情薄義。太陽穴亦即係理財位，呢個位飽滿，主識得處理金錢，有辦法將啲錢養大。頸骨連枕骨，形格威猛，向武職發展較大機會。
頂圓腦厚有為有守，頂圓腦塌中運必敗。
頭頂圓的多數有父蔭，有所作為，腦厚有祖蔭，腦厚即係髮轉位置，如果兩樣都有一生都順利，就算有所損失，都唔會全部，會好快復完。頂圓就有父蔭，腦塌即係後枕平或凹，處事唔得慎重，中年後就最多波折。
頂圓腦塌兼潰爛，中年破敗晚更淒涼。
呢度的潰瀾並唔係真爛，而係無頭髮，即係髮轉位禿頭，淨係呢個位光禿晚境就有問題，有啲就話缺乏祖德，不過有無祖德唔緊要，最緊要係有祖蔭，但係禿頭體力好，亦有魄力，晚境亦不玫於淒涼。
頂平福祿，高隆貴壽，豐隆富貴。
唔單止頭頂圓先至有父蔭，連頭頂平而厚亦有父蔭，高隆好似蔣介石個頭，半隆即係兩邊寬闊，表示呢個人的腦袋好大，天才多數有呢類形格，但係白痴亦有呢種形格，所以唔使太開心。
頂尖孤刑早，陷則壽夭而富貴難，暴露勞苦而刑剋特重。
頭頂尖婚姻有問題，孤者獨身，刑者剋妻，頂凹則智力低，富貴當然艱難，但係未必會夭，短命就要睇好多嘢。呢度講後生光頭，年少禿頭想唔辛苦都難，刑剋講人緣差亦主夫妻緣份唔好。
腦圓而大祖德正隆，腦長而圓祖德綿綿。
有祖蔭同有無祖德係兩回事，呢度講只係有又父蔭，腦長而圓有豐厚的蔭護，腦長即係後尾枕厚。
腦骨潰爛祖上失德，腦窄不圓貧苦中年。
腦骨潰爛即係後尾枕無頭髮，後尾枕頭髮特別少，祖上失唔失德就唔知，無祖蔭就肯定的。腦窄即係側腦唔發達，側腦唔發達表示呢個人無保護性，又無鬥爭性，中年貧苦係應該的，因為中年係一個人最需要搏殺的時候，如後枕厚就都好啲。
頂骨平伏起，枕骨強起，枕高而大遠祖福澤，枕小而圓父祖餘蔭。
平伏起亦即係唔低陷，唔露尖，有責任感，可以管錢。後尾枕骨連肉，有問題就有人幫，最主要係經濟問題。髮轉個位特高，主長輩助力，在社會上有年長的人特別喜歡你。摸落去唔覺尖，就表示後生的時候有父蔭。
枕骨斜出謀生乏術，枕橫骨藏福祿綿長。
斜出即係歪，頭骨歪主奔波勞碌，未必唔可以生存，但係一定辛苦，最好就多頭髮，如果小頭髮就好難改變。後枕骨發達望之好似火星人，容易有橫財，長唔長命就要睇埋其他部位。
枕陷而露敗業滅絕，孤骨而露貧苦無助。
枕低陷就因為持續性唔夠積極，所以遭受少少挫折就無心機。孤骨即係特別特尖凸，過凸就早離家，同時亦少助力。
枕陷且不時挨餓，枕陷成坑必有後殃。
陷破包括歪或無髮，平扁，缺乏咗一個安定的居住環境。枕陷成坑思想唔夠慎密，容易沖動，唔單止後生係咁，老咗一樣，所以話有後殃。
瘦人頸短三十前死，肥人頸長四九而亡。
人瘦頸短就鐘意冒險，死就未必，但係多意外就一定的。人肥頸長未必短命，要睇頸的粗幼，長而粗無問題，長而幼就大問題。
瘦人頸長不富亦安康，肥人頸短早入翰林館。
所謂長係由髮腳至頸椎骨，唔超過一隻手掌位，如果超過就係過長，瘦人頸太長就叫馬頸，凡有馬頸就一定身体唔好，所以頸唔好太長。肥人頸應該短，太短就容易有意外，頸短容易有心臟病，心律不正常。
頸圓而方福祿相當，頸細而長貧賤異常。
古書話方主貴氣，頸方就一定頭骨側腦發達，有保護性同進取性，頸圓個人脾氣好，多命長啲。不論肥瘦，頸幼、過長都好難有好的身体，更加唔會有好環境，搵埋唔夠睇醫生。
如罌如瓶總非吉兆，似鵝似豕恉主不祥。
罌係粗而短，瓶係細而長，又粗又短的叫豬頸，又細又長叫鵝頸，呢度話肥而短同瘦而長，兩樣都唔好的。
頸肉厚實不缺衣實，皮肉瑩潤財雄勢盛。
厚實就係夠粗，同時頸有肉，頸有肉係好難得的，唔露頸筋就係好，後面呢句未必咁啱，純粹係古書上的誇大之詞。
頸裊而斜性劣多貪，頸瘢不潔性鄙且拙。
頸裊而斜即係裊鳥的頸，左搖右擺，主性格貪婪，但係貪小利而乞人憎。頸瘢，即有班，或毛生上頸背，對爭奪性多數都用唔正當的手段。
瘦人結喉迍邅孤老，肥人結喉刑剋禍殃。
頸幼凸喉核，個人唔夠靈活，同時人緣亦未必咁好，喉核太過凸出未必一定有刑尅，但係自己身体就多數有問題，呼吸系統的多數。
面如滿月富貴不歇，面起重城早發晚榮。
面圓突起叫滿月，面長凸起叫重城，其實滿月重城都係同一樣嘢，絕對唔係乜嘢新鮮嘢，原來就係對面不見耳，形成外大內小，不見耳就一定要耳貼骨，耳貼骨就一定包括埋耳厚，耳珠有肉。
面帶三拳邊塞之將，面有城廓衣食不錯。
三拳即兩邊地，兩顴骨，兩腮骨都橫起，呢啲人一定孔武有力，勇猛非凡，多數係武職，佰係奴果女相就太缺乏溫柔之氣，有刑尅之象，面有城廓即係下巴有條肉包住，好似邵逸夫，如果面長而無廓生咶都幾奔波。
額方者貴，額闊更榮，額隆者吉，額圓者佳。
額方者出身環境好，額闊的人就面面俱圓，至於唔貴，榮唔榮就唔知，額隆即係飽滿，即係官祿宮生得好，一定早行運，額圓就手腕靈活，呢度話方、闊、隆、圓，其實係額頭的其本條件。
額闊而塌中年發達，額仰而平晚歲身榮。
塌即日月角唔夠飽滿，無又蔭就好難少年得志，２５歲前都無乜好運，要過咗眉眼運先至有運行。額仰即係向後斜出，但係重要有下巴相配，如困下巴生得唔好，晚境都無得好，如果有耳珠朝海口，就更兼有權力。
額尖而窄早歲蹇帶，額破且缺壯年波折。
一般來講額尖窄主賤，俗語話：朝中無尖頭宰相（以前的額都當頭），家中無額窄貴婦。額頭窄少年運就無乜好睇，額破且缺一定係好多挫折，同時亦無貴人，但係勝在捱得。
額低骨陷刑尅愚頑，碩橫骨露兇惡刑親，額塌少年虛花，額突幼歲孤刑。
額低骨陷即係眉骨上面凹陷成坑，係唔會接受別人的意見。額橫骨露即係額骨向前凸出，呢個人一定好反叛，好難教。額塌即係中線低斜，想有一份長久的工都難。額突多數係講前額上半部凸出，如果加上耳缺，表示父母離婚。
頭大額大粗魯愚眛。
頭大額大係指有前無後，後腦尖細的人智慧一定低，有前無後的人一定係志大才疏，如果加上唇薄，講就無敵，做就無力，如果加上眨眼，就更加講嘢無句真。
額尖耳反三嫁未了，額闊頤朝必是英豪。
額尖即係額窄，汗毛多，呢啲人野蠻，耳反就一定薄，耳厚就好少反的，主個人鐘意攬權，要妻奪夫權，一次婚姻就真係好難到老。額頭廣闊，下頦朝天，英豪就未必有晚福就肯定，古書話晚年出仕。
額闊頤尖迍邅晚年，額窄頤圓困頓初年。
呢度係少年運好，下巴尖晚年就要小心，後生就一定要學專業技能。額窄早年梗係唔好啦，頤位圓就多數得到仔女的助力。
耳厚而大永無顛沛，耳硬上提早歲揚鞭。
耳厚表示祖蔭好，大表示身体好，厚而大就一生都無乜波折。耳硬意志強，耳提高出出名早，如果耳提高而係火形耳的就同母無乜緣份，但係自立性強。
耳薄而軟弄巧反拙，無廓有輪處事無能。
耳仔薄的人鐘意投機，耳仔軟的人鐘意取巧，如果又軟又薄，即係鐘意投機取巧，究竟得唔得就要睇佢當時的流年運。無廓即係好似一隻水売，做嘢唔夠穩陣，同時亦都無魄力去兼顧咁多嘢，處事無能就未必，最主要係睇吓乜嘢事，大件事，最好就唔好搵佢。
兩耳招風破祖離家，兩耳貼腦富貴到老。
兜風耳，如果屋企有錢的就係二世祖，如果屋企無錢的就早離家搵食，祖上得剩番俾佢，係佢地唔啱，點賴得呢個人呢。兩耳貼，即係對面不見耳，後生的成就會大啲，因為缺乏咗個鬥爭性，究竟可唔可以富貴到老就言之過早，因為耳仔係主幼年，同埋一個人的性格。
上夬刑尅重，下尖創業難。
耳頭尖就係火形耳，一定要配粗而硬的頭髮，如果頭髮幼而軟，就身体有問題，所謂刑尅就一定係自己身体唔好。下尖即係無耳珠，無耳珠的就助力少，朋友幫都少，父母就更加唔使指意，最主要就係無一種的持久的沖頸，可以幫人發達，因為容易氣餒，缺少咗屢敗屢戰的精神。
若得垂珠應，早晚定安閒。
有耳珠絕對唔會係安閒的相格，如果垂珠起折，就會好細個就有家庭的變故，唔係老豆就係老母，到咗晚年耳珠就一定好過無耳珠。
耳溝開闊幼歲頑劣，耳溝細小人人寵愛，耳溝骨反懂事較早。
耳溝開闊量度大，因為生好動，好動的人多數大量，好容易就會唔記得人哋嘅錯處，頑劣就因為精神充沛。耳溝幼個人就倚賴性強，性格又嗲，但係就懶啲，做嘢魄力唔夠。骨反即係耳溝短，甚至乎無耳溝，呢啲人早熟，係思想早熟，太早懂事就一定捱苦多過歎世界。
面大鼻小多為人奴。
鼻細的人主意無乜，堅持力唔夠，獨立性唔夠強，如果加上食指短，就更加有好重的倚賴性，所以多數受人驅使，但係鼻細的人多數忠心，最緊要配一雙靚的眉。
面肥鼻瘦錢財難聚。
鼻瘦即係露骨無肉，亦即係土星無勢。鼻為財星，原因係中國自古以來都係以土為財，有句名言：有土斯有財。土星薄就想剩錢都難，尤其是年上壽上靈骨，一定儲埋一筆就會俾啲親戚累你唔見咗。
面橫鼻塌生性兇悍。
面橫即係顴骨橫露，多數都橫蠻無理，鼻塌即係鼻扁，如果鼻高就算野蠻都係擇善固執，如果面橫鼻又塌，就唔只野蠻，仲係好自私，最明顯嘅缺點就係護短，不分是非，亦都無分辨是的能力，但係做大惡事就無膽，只係喺自己的生活圈裏面蝦蝦霸霸。
鼻圓聳印功名鼎鼎，鼻連眉骨父祖福蔭兄弟友愛。
山根高，直插印堂，就容易得到啲有力嘅人帶「歇」，一定要鼻頭夠圓，如果鼻頭尖就人緣無咁好。好似做大戲化粧，眉骨隱約由個鼻樑向外伸展，印堂飽滿就一定出身良好，周圍一定有一班幫得手嘅人，未必一定係兄弟，同學朋友都得嘅。
鼻連邊地終成大器，鼻短樑平自創前程。
呢度啲連並唔係真係由２３，２４個位置直聳而下，而係感覺到有啲氣直沖而下，亦即係來龍豐厚，一定事業有成。鼻短一定要人矮，人高鼻短，想有前程就難，樑平就一定係要鼻樑濶，鼻樑窄就好難有創業魄力。
準豐樑聳家道興隆。
鼻頭有肉，鼻樑又夠高，有白手興家的能力，但係要顴骨相配，如果有鼻無顴，就４４歲後就好容易失敗，要在４４之前搵夠就根本無可能，如果可以搵得夠就一定唔符合相格，一定有其他部位生得好的。
鼻隆而昂仕宦榮昌，鼻直而厚子貴封侯。
在古時，呢種相格只有做官先至有出路，但係現在唔同晒，有好多嘢權力比官更加大，例如做議員。鼻直而厚又點關仔事呢，簡直亂嗡，唯一可解嘅就係鼻厚就人中都唔會太淺啫，仔女身体都會好啲。
鼻如縮囊到老吉昌，鼻如獅子聰明達士。
即係鼻短而大，好似個蒜頭咁樣，呢啲人好有量度，同啲後生好容易相處，到都好開心。鼻翼闊而厚，鼻孔又齊，又圓，聰明同時生性樂觀，獅子鼻多數鼻樑夠長而厚，鼻樑薄就唔夠樂觀。
鼻如截筒財祿亨通，鼻如懸膽白手興家。
鼻孔齊而平，就適合做啲正常收入嘅工，就好少有失業嘅，但係突然間的橫財就少之又少。所謂豬膽鼻，呢種鼻係女人度就好，如果男人有豬膽鼻就氣量淺，同時變能力不足，女人有就旺夫，鼻為夫星，女人小氣啲都唔緊要。
鼻柱廣長必多伎倆，鼻有損破孤獨饑餓。
鼻樑廣即係闊，闊而長一定魄力好，有足夠的精神体力去學好多野，最緊要就係呢種形格的鼻有上進心，如果鼻樑窄而皮薄，你迫佢去學都好難。破損即係土星受損傷，即係財星受傷，就梗係窮啦，人窮就想唔孤獨都難。
準頭尖小人多賤，孔仰家無隔宿糧。
準頭尖就主個人有原則，樣樣都依照規距嚟做嘢，無乜人情味可言，呢度啲尖小係話薄而見骨，凡鼻尖見骨的人多數忘恩寡恩。朝天鼻使錢無節制，尤其是流年部位有破損，就一定無端端耗費大量積畜，如果行正鼻運就要睇鼻翼厚定薄，先至決定當時的運氣點。
年壽高明無災有慶，雙座光澤夫唱婦隨。
年壽高明無災就未必，就要睇吓皮薄抑或厚，高明即係羅馬鼻，表示有進取性，慶即係好事，有進取心梗係好啦。雙座即係夫妻座，夫妻座嘅範圍由４２，４３至到年上壽上呢個位，如果無烏黑無灰暗，一定夫妻和諧。
金匱依禁房錢財滿庫，子宮傍夫座福祿駢臻。
金匱即係鼻翼，依禁房即係鼻翼同面部無起坑，接口、界線好平滑，就好多積畜。子宮即係眼肚，子女宮，傍即係傍住，夫座即係勾陳位，子女宮生得靚而又見到勾陳位飽滿，就有夫福享，呢度係講女人的。
甲匱連準起多財多寶，顴骨入天倉有權有勢。
甲匱即係鼻翼，同上句金而成金甲位，連準即係鼻翼位同鼻頭之間無一條凹線。入天倉即係顴插天倉，有權就多數，有勢就未必。
鼻隆顴拱自助人助，顴高鼻塌多成多敗。
首先一定要自助，顴拱表示有奮鬥心，鼻頭圓就有人緣，所以自助之後就有人助。鼻塌未必一定鼻形有問題，有厚顴埋鼻的形格，呢個人無乜主意，成功的機會就少啲，多敗亦未必啱。
顴高頤削作事難明晚歲伶仃，獨顴無面中年破敗子散妻離。
顴高頤削即係牙較骨薄，貪婪，太過現實，有利就六親不認，晚年孤獨係正常嘅。顴骨過高，面削，呢度係顴高壓目而面又薄削，再加鼻樑尖削。
顴露顴尖破財中年，顴面低窊孤獨無家。
顴骨露，皮薄，破財就未必，但係一定招惹好多是非，最主要係口舌是非。顴面低羽，即係顴骨位置生得高，成為顴壓目，而面珠凹陷，性格孤獨人緣差，到老想唔孤獨都難，無家就未必。
頦方且圓晚年福祿，頦尖而矯有子不孝。
由字面晚年安穩，要有福祿一定要飽滿，地閣方未必夠圓，圓又未必係方，淨係圓即係有肉無骨，所以有啲人係唔可以瘦嘅，瘦親就環境轉壞。下巴尖福薄，矯即係尖而向出，凡尖一定肉薄，唔可以有仔女在身邊，仔女對自己好唔好就要睇子女宮，如果子女宮結實，仔女多數會留喺自己身邊。
頦短且縮晚歲淒涼終不祿，頦尖而長一生貧苦又無良。
下巴短嘅人就多數性急，縮即係「巢」皮，凡親巢皮一定缺乏實行能力，亦都缺乏咗堅忍能力，咁嘅相想晚境好都難。下巴尖而長性格多輕挑，尖就一定無肉，即係無積畜，一生貧苦又未必，無良唔係，有無良心絕對唔係下巴尖唔尖而定的，係有無鼻油而缺定，或者好似勾踐。
頭圓足方真富貴。
呢個圓唔單止額頭圓，重要頭蓋骨圓先至合格，叫做真圓。頭圓取象為天，足方取象為地，足方唔係隻腳四方，而係腳板底厚。頭又夠圓，腳板底又有肉，天地俱備，就天生好命，富唔富貴就要睇埋其他部位。
頭尖足薄定貧窮。
頭尖即係額頭尖，額頭尖即係額窄，額窄就少年運差，但係如果加上天靈蓋尖就唔同，天靈蓋尖就算額窄都可以逢凶化吉。足薄即係腳板底無肉，腳板底無肉就一定係腸胃多病，腳瘦同薄唔同，腳瘦即係腳面瘦，腳面廋就一定係際遇唔好。
頭大口小貧苦早了。
頭大就要眼大口大，如果頭大口細就交際手腕唔夠靈活，所謂口大食四方，食四方者即係人緣好，男人出外搵食一係就鼻頭有肉，一係就口大，如果兩樣都缺乏，就打工好過做生意。
顴高倉陷有顴無權。
倉即係天倉，顴高唔單止要有面，重要天倉飽滿，如果淨係得顴高，又無面又無顴，就不過係假權啫，喺屋企可以大聲夾無準，但係出到街就無聲出。
頦骨連頤晚福可期。
頦骨連頤即係下巴方圓，下巴方圓有肉梗係有晚福啦。
頦尖頤削到老苦作。
呢度同上句就啱啱相反，兩邊腮骨削，下巴尖想有福都難，唔使等到老。有呢啲相一定要有專業技能，否則真係到老苦作，作即係技藝。
頦骨連腮呼喚成堆。
頦骨連腮下巴連腮骨，但係又未至於耳後見腮，表示子女成群，唔係伙記多。
長如茅立破祖離家，短如豕蹲頑劣多凶。
身大瘦、高、茅立即係企得直，呢度講無蘿柚，一定早離家搵食。豕蹲即係豬，肥而行動遲緩，就一定性格頑劣，亦都唔會太長命。
體大骨秀名滿宇內，體小骨秀不富便貴。
秀即係唔露節，身体高大而有肉包住，會有名氣，身瘦而膊頭有肉，多數都係有錢人，而且可以長久。
胸闊而平豪邁絕倫，胸平而窄難當重任。
胸闊而平首先要膊頭夠橫，呢啲人有義氣，膊頭橫就可以承擔重要責任。胸平而窄就一定係膊頭唔夠橫闊，所以唔可以擔當重任。
胸闊厚實富而好施，胸寬露骨破敗落寞。
胸闊幾時都係好啲，厚實其實係背脊，背脊厚就一定有福，好施就係心地好。胸闊露骨，有胸無背，背脊露骨就福薄，都好難有真正朋友。
上露下陷孤苦到老，上下皆陷奸貪枉法。
上露下陷就係雞胸狗肚，雞胸向外凸，狗肚向裏面縮，呢啲格第一身体差，第二就缺乏堅忍力，第三無容人之量。即係上下成坑，瘦而露鎖骨，肋骨露坑，枉法就未必，貪小便宜，惊蝕底就真嘅。
胸闊而促生性狠毒，胸凸而挺生性愚蠢。
促即係短，即係腰短，腰短的人多數勤力，富於進取，如果腰短而背薄，富於爭取性但屬於不擇手段嗰類。淨係雞胸，缺乏爭取性，愚蠢就未必。
婦人胸寬賢淑端莊，男人心陷作事見小。
不論男女都以胸闊為好，所謂胸衿廣闊係真嘅，胸窄氣量一定淺，但係胸闊背脊一定要有肉，如果背脊無肉，樣樣睇唔開，胸骨窄，個人小器做啲嘢唔似男人，乸形。
胸長不直有才無德，胸短不平為富不仁。
即係寒背，寒背就算有才幹都無魄力，呢個德係解能力。胸短即係腰短，腰短就一定有進取性，短而凸露，為富不仁就未必，手段可能差啲。
背若屏風福子孫，背若負龜必有施為。
背若屏風即係闊，闊就係顧家。負龜即係厚，背脊厚就梗係有福啦。
背如負物邊陲將帥，背如團扇現成基業。
背如負物即係步履穩重，俾人有一種安全感，可以担重責，並不限於邊陲帥。背如團扇即係膊闊腰窄，有父蔭，守唔守得住就要睇其他部位，例如有無羅柚。
背部偏斜絕嗣貧夭，背部薄窄不貧則折。
偏斜即係脊骨歪，脊骨有問題就想生仔梗係難啲，貧夭就未必。薄窄就一定肺弱，貧就未必，容易有肺朥，以前有呢啲病就實死梗。
兩肩平闊衣食不缺，肩窄下垂毫無作為。
膊頭平闊就一定有魄力，自食其力，唔鐘意靠屋企。肩下垂唔緊要，最忌鴛鴦，左右唔平衡，如果唔平衡就行路左搖右擺，達唔到行如風，立如松嘅要求，得唔到人地嘅信任。
兩肩上聳所發不久，肩聳肩寒老無一椽。
兩肩上聳，叫做膊頭高過耳，唔可以將自己的成果長久保持，就算係火形人都唔可以長期保持長久。寒即係露骨，凡膊頭露骨多數都老來無得倚靠。
右肩低左肩高白手興家，左肩低右肩高別祖離家。
呢度屬於盡信書不如無書，相裏面凡有高低都係唔好嘅，點會話白手興家，簡直攪笑。
臀圓骨開諸事亨通，女人臀大反為下賤。
臀圓即係蘿柚有肉，無論男女都要有肉先至好，無肉就係空心老官，女的夫妻運都唔好。骨開即係盤骨闊，就唔會壓迫腰部，腎機能好，尤其是女人生養容易。臀大一定係反常的大，唔單止蘿柚，任何嘢反常都係唔好。
小兒無臀災厄頻仍，縱然乖巧能言而亡。
細路仔無蘿柚就係身体差，亦表示老豆唔叻，但係如果鼻頭夠圓就會好啲，如果鼻薄就認真差。
少年無臀百事無成，田園不守破祖離宗。
無蘿柚無論乜嘢年紀都係差啲，少年就續書好難有成就，同時亦好難有祖業，有都守唔住。
中年無臀破祖飄零，刑妻尅子奔走紅塵。
如果少年有蘿柚，而到中年反而無蘿柚嘅話，身体一定有問題，如果到中年都重未有蘿柚嘅話，就算有祖業都守唔住，成日不停奔走，居住的地方亦唔安定，老婆仔女跟住佢想唔刑尅都唔得，性格又唔合群，人緣好極有限。
老年無臀刷鍋洗盆，無依無靠孤獨終身。
如果中年無蘿柚，晚年亦一定唔會有，都唔慌有積畜，什工都要做，洗鍋刷盆呢啲工唔慌會高級，蘿柚無肉晚年就一定孤獨，獨身就未必，最主要係無積畜，如果加上無腳瓜「朗」，就真係獨身居多。
肥人無臀多學小成，半生無運四九歸冥。
肥人無蘿柚，即係空心佬倌，點樣勤力都唔會有成就，唔係多學小成，係根本唔肯學野，但係可以後天補救。四九歸冥係話３６歲有大劫，呢啲係講好肥嗰種。
瘦人無臀四處奔波，縱有小就終無一成。
瘦人無蘿柚就一生勞碌，想優悠生活就好難，但係如果瘦人有曲線就多數好命，亦都可以有積畜。縱有小就係講中年的瘦人後天就容易啲，但係過咗中年就好難再有機會。
身長無臀木屐無釘，身矮無臀孑然一身，若還尖矯不免輕佻。
身長係腰長，腰長蘿細容易跌倒失敗，腰長都一定懶，腰長加上無蘿就容易氣餒，有小小挫折就容易自暴自棄。腰短嘅人就勤力，腰短而無蘿嘅人性格自私，人緣差啲，呢度話孑然一身並唔係話無老婆或者無老公咁解，只不過係朋友少啫。若還尖矯，唔係蘿柚凸起，較為難以觀察，呢個蘿柚尖係要踎低先至見到，一般行路或者坐低係見唔到嘅，有呢種形格的大事就一定退縮，表面係睇唔到。
面長身短中年發跡，面短身長衣食奔忙。
面長中停長，中停代表中年，４０至５５歲，身短腰短，腰短勤力，肯搏，就算無其他特別嘅好相好部位，到咗中年都一定有好環境。身長懶，面短反覆，兩樣夾埋就屬於見異思遷，唔守本份，多數都一事無成。
面瘦掌方孤苦淒涼，面短掌圓衣食自然。
面瘦屬木形，掌方屬金形，思想同行動唔協調，木形屬思想形，金形屬行動形，面瘦掌方形成思慮過多，諗多過做，好難有成功機會。凡面短人好動，掌圓屬水面短帶圓屬水，有動嘅意欲，兼且人緣好，又肯勤力，所以衣食好，同時面方圓嘅人食祿倉好少薄的。
身長腳短富貴可斷，身短腳長貧無住場。
身長腳短有個花名，叫做矮腳雞，性格善於爭取，識得把握機會，富貴就未必，但係生活無憂就肯定嘅。身短即係腰短，本來係勤力的，但係如果腳特別長，呢個腳長係指小腿特長，小腿特長即係無腳瓜「朗」，凡無腳瓜朗嘅無論做嘢或居處，都好難安定。
兩手白潤富貴前定，兩手粗黑謀生乏術。
兩手白潤即係皮膚幼細，毛孔細，手背皮厚，表示出身環境好，可唔可以一生富貴就要睇埋其他部位。手背根露想唔克都唔得，呢度話謀生乏術唔啱，手背露根多數有一技之長，但係毛孔粗嘅就算有技術都係好辛苦嘅技能，例如打石嘅技能或者搬運嘅能，如果毛孔細嘅就可能係修理鐘錶技工。
手軟如綿衣食兩全，手如乾薑家道必昌。
手軟如綿就一定要多肉，如果手軟而薄就一定從事唔正當的職業，女人手薄就福薄，呢個福係指夫緣。手如乾薑係女人專有嘅，另人極之少，乾薑即係手皮粗硬，呢啲女人鐘意做家務，同時一定有潔僻，握手的時候感覺好似柴皮咁樣，就係呢種人。
臂如捆布不貴便富，臂中肉拱苦作有種。
捆布即係圓，手臂有圓有扁兩種，手臂圓表示發育良好，身体好，同富貴有乜關係？臂係指上臂，上臂連膊頭，膊頭厚就一定福緣厚，膊頭薄就表示搵到都剩唔到，剩得到都好辛苦。臂有拱肉即係手瓜起𦟌，以前多數係苦力先至有嘅，但係現在就視之為健美，因為現在職業已經再無貴賤之分，有種即係天生嘅，以前啲人重文輕武，都唔用腦稔吓，無体力努動的人又點會有屋住呢。
臂圓而長衣食相當，臂細下尖衣食難言。
臂圓即係上臂豐滿，見肉唔見骨，有咁嘅臂骨一定膊頭有肉，又背脊有肉，衣食自然好。臂細下尖即係手較骨大，一定係身体唔好，手瓜幼一定肺量細，呢度同貧富無關，亦都同出生環境無關。
肘短而圓衣食自然，肘長而扁貧窮難免。
肘係前臂，前臂短係自然之相，正常嘅相係身長過臂，臂長過肘，肘長過掌，掌長過指，如果其中有一樣唔對稱，呢個人一定辛苦，最常見嘅就係手指長過手掌，多數辛勞搵食，呢度話肘長而扁就係長過臂，一定辛勞搵食，貧窮就未必。
肘短而直不愁衣食，肘長瘦尖貧苦顛連。
呢度啲肘短而直係以前啲讀書人特質，表示唔使勞力搵食，以前的人唔崇尚運動，對手瓜起𦟌視為賤役，根本唔知道係身体健康的象徵，所以後來俾人譏笑為東亞病夫。肘長過臂，加上尖瘦，手掌較骨大，一定手背露筋，手背薄就一定出身環境差，但係唔代表一世窮。
腕秀而方珠玉滿箱，腕正而圓衣食眼前。
秀係唔露骨，方而有肉夠軟係好少嘅，多數都係手軟而長形，方形嘅好少。如果手方形但係又硬嘅多，所以方而軟嘅係好少，手掌長而軟嘅人無自制力，手掌方而軟嘅人有決斷力，有掌權能力。腕正而圓係近手頸線，呢度肉厚就一定有父蔭，所以話衣食眼前，但係身形肥胖就唔會有父蔭，好似肥肥個女，一出世就無父蔭。
腕粗骨露一生苦作，腕邊起墳告貸無門。
腕粗骨露一定配王字面，性格一定頑固，重有一樣缺點就係顧多唔顧內，唔係勞苦大眾都係餐搵餐食之人。腕邊起墳一定配鼻樑薄而起節，俾人一種信唔過嘅感覺，有困難嘅時候好難有人幫你。
掌背厚如龜福祿皆可推，掌心窩如碗倉豐庫亦滿。
掌背厚唔見筋，已經係有福之人，根本唔便厚如龜。掌心如窩有錢剩，剩得辛苦抑或舒服就要睇吓手背厚定薄。
掌厚骨軟幸福不淺，掌粗骨硬橫蠻任性。
呢度係講女人嘅，掌要厚，就男女都啱的，但係骨軟男人就無咁好，手骨太軟就主倚賴性強，女人就無所謂，男人就梗係唔得啦，女人有呢掌就樣樣都唔使操勞，有福之人。掌粗係講手皮粗，女人手皮粗表示呢個人有主意，以前啲人唔鐘意女人有主意的，所以話橫蠻，骨硬有行動性無倚賴性，唔使等人地同意而自己去做，所以橫蠻加任性。
手掌常溫無求於人，手掌常冷時多困境。
手掌常保持溫暖，第一身体正常，第二心境平常，唔會太過緊張，亦唔會急燥，做嘢程序安排得好有條理。手掌冷熱無常，表示呢個人情緒好唔穩定，運程起落不定，好一陣，跟住又行衰運。
掌軟如綿快樂一生，粗硬露筋苦作辛勤。
呢度啲軟如綿係包括埋手指嘅骨節，手指背節紋不露，表示做嘢少波折，手指背越多皺紋，就越係要親力親為。有紋都唔止仲露埋筋，想做嘢唔辛苦都好難，仲要好勤力先至夠生活。
不熱常汗心苦自敗，掌滑如苔事業堪誇。
手汗大表示心情緊張，自信心不足，做事患得患失，多數成少敗多，但係如果天氣熱有手汗係正常嘅。手皮滑表示做事有毅力，最緊要就係唔容易氣餒，所以成功嘅機會就一定大啲。
十指端正一生順境，十指尖長家有儲糧。
十指端正，正確係手指夠直，手指直無論係自己做嘢或係合作都好順利，如果加上唔露骨節，就更加優勝。十指尖長一定要好似筍形，手指如竹筍，就一定出於富貴之家，就算唔係出生於有錢之家都好容易教。
指柔而密財恒自給，歪枯連皮孤獨無依。
手指罅疏就使錢無節制，密就自制能力。手指與手指之間嘅皮生得高，同時亦都皺皮，性格極度孤獨，老而無依唔出奇。
指禿短生性愚魯，指硬而疏衣食難周。
手指長就聰明，手指短就缺乏好奇心，如果短而掘，判斷力唔夠而又唔肯接受人地嘅意見，愚魯就要睇埋額頭夠唔夠高。指硬而疏就一定係際遇唔好，俗語話雞爪形，生活一定困難。手指抑即手指向後彎，古書上面稱為「反元」，主六親無靠嘅就一定係大姆指向後彎得好利害，但亦都主容易得橫財。食指後彎主好虛榮，為人唔實際。中指後彎貪玩而不務正業，成日轉工，但係手指夠長就可以減少缺點，最忌向後彎而短。如果淨係左手係咁，到咗中年就會改變，如果左右手都係咁，就到老性格都唔會改善。指尖扁唔適宜早當家，更加唔適宜早婚，因為２５歲前運氣都唔好，同時亦唔識理財。手指短，手指唔適宜太短，尤其係尾指，尾指短除咗代表疑心大之外，如果短過姆指重更加表示呢個人係奸嘅，而且屬於奸詐多計。手指硬多勞碌，會同親人有隔膜，年紀越大，同親人嘅隔膜亦都越大。手指頭掘就做唔到精細的工藝。手指歪斜－食指歪自信心強，能吃苦，中指歪表示容易睇人唔起，生性傲慢，無名指歪任性而為。做嘢唔顧後果，尾指歪主仔女唔聲話。大姆指歪係最唔好嘅，表示做嘢唔夠魄力，遇困難容易退縮，屬於無事牙擦擦，有事脷刮刮。指逢疏除咗對金錢觀念弱之外，亦主六親無助。上端疏主唔聚財，指根疏主無情，指有節多數工作辛勞。
手長過膝興創事業。
呢啲屬於奇相，凡親奇相就一定要在亂世先至有機會，太平盛世就唔會有出頭嘅機會，睇歷史就可以証明。
手短腳長性行不良。
手短腳長無論肥定瘦都有兩個缺點，一就係無腳瓜，二就係無蘿柚，無呢兩樣嘢，個人想好都難，其實唔關手短事。
胸寬背厚光前裕後。
胸寬主才智，千祈唔好窄，所謂心胸廣闊，背厚重緊要，背脊厚就福澤厚，土形人多數有呢啲形格，屬於平凡人一個，但係如果木形人有呢種形格就一定有好嘅成就，一定超過前人，亦都有能力福蔭後人。
胸凸背凹勞苦早卒。
胸凸即係雞胸，背凹即係脊骨成坑，兩樣加埋就係腩部有問題，勞苦就未必，但係短命就好難避免。
前仰後俯邦國之輔。
在前面望個胸好挺，在後面望背脊好厚，成前仰後合之格，呢啲人做嘢有沖勁，性格又穩健，如果一個機構有呢啲人一定發展得快而又作風誠實，好似中個領導人有個都係咁。
背寬胸厚富貴長久。
背寬做嘢就有担當，胸厚就心地好，背脊厚為中忠誠，加上心地好，一定好早行運，做嘢腳踏實地，唔會冒險，所以生活就算唔係大富亦都平穩。
有背無胸晚年孤貧。
有背即係背脊無坑，唔會係厚，無胸即係陷，胸陷就器量淺，至於晚年孤貧，就要睇埋地閣位好唔好先至決定。
雞胸鴨背多非善類。
雞胸即係凸而露骨，鴨背即係薄，背薄做事就唔夠踏實，胸凸就唔同豐厚，厚就心地好，凸而露骨就啱啱相反，樣樣都唔順超，所以話多非善類。
狗肚雞胸狠毒深沉。
狗肚即係窄小而凹，又叫蜂腰，腰窄一定要配闊肩，如果肩又窄，心性唔平衡，無容人之量。
弓背蜂腰過路拆橋。
弓背即係「㗳頭佬」，蜂腰即係無肚腩，㗳頭而腰細，專係度橋，就算損人而不利己都覺得好過穩，但係㗳頭而有肚腩嘅一樣係算死早，但係就一定要對自己有利先至肯做，凡㗳頭嘅人都無所謂義氣，只有利字當頭，所以對呢種人只能夠動之以利，切勿以為感情交情對呢種人有用。
鱉背龜胸好色貧窮。
龜背係有福的象徵，但係龜胸就唔好，平而露骨，呢樣唔可以判斷為好色。鱉背亦即係平而扁，有呢啲咁樣的形格想唔窮都難，至於好色與否就未必。
肩寒背削資財耗盡。
寒即係薄，膊頭見骨就無論搵幾多都係多餘嘅，因為一定有啲無無謂謂嘅嘢令佢使晒啲錢，好似梅艷芳，凡膊頭見骨好難背脊有肉，想有積聚都難。
肩闊臀寬到老無波。
膊頭闊就有担當，肯承担責任，臀闊就有後福，一生都無負於人，亦即代表咗人緣好，到老無潻係正常嘅。
腿長圓肥衣食俱全，短圓粗貧賤多憂。
腿係大脾，腳同手係一樣，都要一截長啲一截短啲，大脾長過小腿係先決條件，圓而肥亦都係最基本嘅，因為大脾肥就蘿柚多數有肉，衣食就一定唔差。同樣係夠圓有肉但係大脾短過小腿就問題大，貧賤就唔啱，但係多憂就一定，因為小腿長過大脾就一定做嘢不分輕重，如果加上額頭低就一定是非不分。
腿大長圓智大福厚，短若細瘦勞碌奔走。
腿大加長又圓福厚就可信，智大就未必，大脾夠長就表示性格溫良，所謂賢。短己經唔好，重要瘦，做嘢就唔慌叻，唔使講就一定勞碌奔走。有一個好難聽的名，叫狗腿，狗腿就一定係大脾瘦而短，人腳攪到狗腳梗係唔慌好啦。
膝圓而大無災無害，膝露而尖官訟連年。
膝圓即係有肉，膝頭有肉就一定有大脾有肉，大脾有肉就蘿柚有肉，就一世夠運。膝頭哥露骨就一世都唔夠運，身体亦差，正式係膝頭大過脾，想好都難。
膝圓方藏富貴異常，膝骨尖露必遭牢獄。
呢句同上一句大同小異，藏即係肉厚，富貴異常就真係誇大。膝尖露骨就容易招惹是非，有無牢獄之災就要睇其他部位，例如生命線有無方格。
脛前骨生稜角，脛中骨如刀背，命運不由人常遭小人妒。
脛即係小腿，脛前骨即係膝頭對落，將個膝頭屈埋就見到。正常應該係圓或者平，如果有凸出就唔合格，自主性唔夠強。脛中即係上下五寸，原則上任何一條骨都要圓而好似竹咁先至合格，但係小腿骨就有分別，小腿骨就有啲係扁形嘅，摸落去就好似刀背脊咁樣，呢個人就會好辛苦，一樣會招惹好多是非。
小腿圓直豐衣足食，小腿不圓衣食難全。
上面話脛骨扁就勞碌，呢度話脛骨圓就有好環境，因為骨圓多數有肉，如果皮包骨就想好都難。
脛向前矯好吃懶做，脛向內彎大言不慚。
呢度啲脛向前即係腳向外彎，同向內彎係一樣嘅，小腿唔夠直就一定性格上有缺點，唔係懶散就係鐘意誇大，呢兩句分開精細啲，因為向內彎嘅人多啲，呢個世界作大嘅人多。
脛如竹杖貧賤不良，脛如瓠瓜生性愚蠢。
脛如竹杖就係無腳瓜朗，好似支竹咁樣，想搵到食都好難，不良就未必，以前啲人寫書通常都將貧同賤拉埋一齊，其實貧同賤係絕對唔同的。脛如瓠瓜，最貼切就係水瓜，兩頭細中間大，呢啲腳形就一定配一雙鴨乸腳，呢啲人嘅智力就低啲，如果加上眉壓目就更加肯定唔會有高職位，有呢啲腳形多數都係由面，後生時一定辛苦。
腳背厚方富甲一卿，腳下容龜富貴可推。
腳背同手背一樣，最好就唔露筋，手背主先天性，即係出生環境，年幼時嘅家境，腳背主後天嘅際遇。腳背有肉「肥嘟嘟」就多貴人，如果手掌有貴人線出現表示佢現在所謀嘅事一定好順利。腳下容龜即係腳掌個窩好大，腳窩大表示有父蔭，呢個位好唔好就一定要會行先至睇得準，ＢＢ仔太細係睇唔準的，所謂富貴可推即係老豆剩番好多俾佢。
腳背有肉現成福祿，腳心有肉堆金積玉。
腳背有肉就際遇好，貴人又多，腳背會跟年歲而改變，可厚亦可薄。腳心即係腳掌位置，腳掌有肉就彈力好，行路姿勢唔會搖擺。俾人一種好穩定的感覺，如果加上背脊厚就想窮都難。
腳背無肉不賸一錢，腳背平薄貧窮之輩。
腳背見晒腳指骨，好似雞爪咁樣，想剩錢都難，最主要係晚年無積蓄。腳背平薄即係皮薄，露筋就好難身居高位，亦都搵唔到錢，唔好講有無得剩，搵到至講。
腳小背厚不富則貴，腳大且橫不免貧窮。
如果係土形或金形人就唔可以腳小，因為土形人身形多數厚實，金形人多數骨架粗，所以呢兩形人腳小就唔對稱，亦都唔會富貴，其他水、木、火形就可以容許腳細，都有富貴機會。腳大且橫即係腳板闊，腳以長形為貴，如果向橫發展，呢個人屬於四肢發達，頭腦簡單之輩，想唔窮都難，一定從事体力勞動嘅職業，亦都多數係王字面形嘅人，有一個好處就係身体夠強壯。
五趾纖長必定賢良，五趾端正豪萬成性。
腳趾長有一個特點，就係容易諒他人的過失，如果長而有肉就原諒咗佢，而佢會記得你，如果長而露骨，就算你對人點好都無用，例如借錢出去通常都無得還嘅。五趾端正即係唔丫開，隻隻拍得好埋，表示呢個人好通情達理，如果加上鼻頭有肉，呢個一定係善長人翁。
中趾長圓絕處逢生，趾短而禿一生苦作。
呢度啲中趾即係二趾，通常話二趾長過公，唔死一世窮，其實唔啱，二趾長嘅人一定捱得，至於窮唔窮就要睇佢腳有無露筋，如果腳背見筋，捱得，但係搵唔到錢。呢度話長圓可以絕處逢生，唔使講梗係有肉。腳趾短無問題，最忌就係禿，禿即係掘，本來腳趾就唔會尖嘅，但係呢度啲掘係頭大尾細，變成掘都唔止，重要腳趾罅疏，，就最差，一世都辛勞，呢個辛勞唔係一定体力的。
大趾短圓父母俱全，大趾長尖自身顛連。
我哋睇人有無福就一定先睇腳趾公，如果腳趾公好肥好厚，唔使講，呢個人一定好福氣，如果係男人就一定和藹心地好，做著佢伙記一定好好福利，如果係女人，唔使睇都知道有一個靚鼻，即係一定旺夫，但係有個靚鼻未必會有一隻靚嘅腳趾公，呢啲就只係自己做嘢叻，唔一定會旺夫。腳趾公長短唔緊要，最差就係尖或者扁，腳趾公尖就辛苦，好難有一份「印印腳」嘅工，腳趾公扁即係薄，就際遇唔好，如果扁而腳指甲生前，就更加一世無運行，正式輪到你都唔到你。
粗短起節性情頑劣，曲折歪斜無惡不作。
粗短起節就唔限於腳趾公，其他腳趾都係咁睇，凡親起節露罅細路都係難教啲，至於曲折歪斜無惡不作就未必，但係貪心就真嘅，既然貪心就一定自尊心都差啲。
脛黑且瘦衣食奔走，脛白而圓風光眼前。
小腿黑白就一定要睇全身皮膚，如果小腿特別黑，即係當時的腳頭唔好，好容易俾同事譏為「陀衰家」，瘦即係小腿無肚，無腳瓜朗，就搵到食都搵唔到著，梗係奔走狼忙。無腳瓜朗而見肉色白潤，其實亦唔係好現象，只係代表當時小小好環境，一陣好啲過咗之後又回復番唔夠食，餐餐清的局面。
細如鶴腳不貧則賤，粗如瓠瓜先苦後甜。
細即係幼，唔單止無腳肚，重好似一支竹咁樣，又直又幼，身体又唔好，際遇又唔好，貧就肯定，賤就未必。粗如胡瓜有呢啲腳形就多數都有一副由字面，初年就運氣差啲，但係晚年就有福享，呢種腳形女人多，另人就較為少啲。
腿大膝圓如斗一生不到公庭。
大脾有肉，膝頭又圓表示一生做嘢穩陣，個人修養好，處處容忍，所以惹官非嘅機會少好多，呢度話斗咁大，只不過係形容詞啫。
腿瘦脛細如杖為人下賤不良。
大脾瘦又無腳瓜，得個膝頭，正式係膝頭大過脾，下賤不良就言過其實，身体唔好就一定嘅。
腿瘦膝尖常招官訟。
大脾瘦就福薄，上身肥而下身瘦想有福都難，膝頭尖就係波蘿蓋細，膝蓋骨細就呈尖形，唔係真尖，無人個膝頭會尖嘅，有呢啲形嘅人成日都無端端招惹是非。
腿膝皆小貧窮難了。
腿膝皆小係指比例唔正常，如果人矮就要短，人高就一定要長，如果人高腳短，即係腰長腳短，呢個人的奮鬥心一定唔夠強，一遇挫折就容易氣餒，缺乏咗一種屢敗屢戰嘅精神，所以話貧窮難了，即係好難斬斷窮根。
輔角插邊庭名揚四海，內府連高廣身躋朝班。
輔角即係２１、２２部位，插邊庭即係同２３、２４部位相連，並唔係伶伶仃仃一舊骨起，而係有一度氣隱約相連，呢度輔角連邊地，後生容易出名，如果讀緊書都會做到學生會會長。高廣的位置係中正側邊，內府係火星側邊，呢啲位相連就主有高職位，呢啲部位係好細微的。
邊地四起五十亨通，輔骨隆高三九居官。
前面話輔角插邊，即係相連，呢度淨係兩邊地，兩輔骨各自有起伏之勢，困為並無相連，所以勢唔夠大，形成額有凹凸，所以行運就遲，五十亨通其實就話根本無運行，要睇額運一定係年青人，話五十行運簡直就係擾笑，好過話你無運行啫。輔骨高隆即眉中間對上位置，同輔角唔同輔骨高一定連帶左右丘陵飽滿，所以話三九居官，即係２７歲就可以有成就。
天庭上連左廂官居極品，日月角聳天非庸凡相。
天庭上連左廂，天庭即係天中位置，上連左廂，其實係天庭左右兩個位，一個係高明，一個係高廣，天庭同呢兩個位相連，就係天庭飽滿由來，官居極品就未必，但係出身好就肯定嘅。日月角聳天庭即係天庭飽滿嘅範圍更加大，額頭平滿的位更大，形成天庭廣闊，一定唔會係普通人。
天府房心看宦途名利皆可問，戰堂驛馬如立壁忠義不須疑。
天府即上二府，上二府即係理財性，房心係包括埋眉尾與髮尖嘅距離，呢個位闊同埋財性飽滿表示個額一定唔會窄，有呢啲先決條件就可求名求利。戰堂即係前額，額如壁立就一定忠心，唔一定係對某一個人忠心，或者對集團、黨、國家忠心，亦都代表對自己所做嘅嘢，行業忠心，唔輕易放棄，加上驛馬亦夠直，表不就算離開咗佢公司都唔會出賣以前公司，加上口形靚，就好有口德。
司空額角如立壁為社稷之臣，上卿少府豐俱隆應徵賢之認。
司空即係２２歲位置，同額角位置，壁立即係飽滿，多數都係做政府工，而且可以做到退休嘅機會好大。上卿即係２９、３０，少府即係眉山上面位置，山林位加上眉角上面相連飽滿，多數都係社會上面嘅首長，社會上面社團首長，亦都表示呢個人愛出名，但係唔會太孤寒。
司空平滿神光藏，日月豐隆驛馬肥。
司空２２歲，在面部正中第四個位，有骨起而隱隱約約有光就係最好嘅，就算唔飽滿都要平滿，平正，唔可以有紋破，如果有唔好嘅色主有突變事件。日月即係日月角，在眉頭之上，豐隆唔係見骨，加上驛馬位高，代表咗呢個人有父蔭，少年得志，主出外留學。
雙林豐滿多逸樂，邊地骨起足威權。
雙林係２９、３０，左右山林、眉角嘅上方，又叫福堂，又叫驛馬，於十二宮之中係遷移宮，呢個位豐滿無破，主能夠安居，唔使成日搬屋。邊地即係邊城，２３、２４，左右邊城，即係山林外邊兩側，有骨起顯貴，好容易升職，多數係武職，如果色澤明黃，主遠行有利。
中正聳額官高祿厚，龍角插天輔弼良臣。
中正在前額正中嘅部位第五位，司空位下面，印堂上面，在十二宮之中叫官祿宮，所以特別重要，人嘅一生事業都係喺呢度表現出嚟，呢個位飽滿就容易身居高位，但係凹陷再加上有尅點，做嘢就必定多挫折，有班痕破紋，容易若官非。龍角即係天庭１９歲，１８、１７歲的總稱，呢三個部位合而為一，隱隱約約見有條氣向髮腳位上升，就叫做龍角骨起，如果色明潤，就一定身居高位而順利，如果顏色灰暗，就算身居高位都容易俾人篤背脊。
虎眉凸起連牛角社稷無危，輔骨巍峨向懸角山川永固。
虎眉連牛角即係眉骨連日月角，似牛角就係向頭壳頂直沖而上，有呢啲形格一定係武將，相傳明末名將袁崇煥就有呢種相格，後來崇禎佢殺咗，明朝就跟住亡咗。係講左古邊城位置有棋紋相連而無破，就一定身居武職，如果高職就一定邊城骨凸起，而又有棋紋相連，如果只係有骨起而無紋相連，就只係武職，唔會係高職。
福堂橫連太陽穴中貴早發，華蓋橫入後腦骨小貴亦榮。
古書上面一個位置有好多唔同嘅名，呢度福堂即係左右山林，２９、３０部位，如果同太陽穴相連就主少年發跡，貴就未必，一定要睇埋中正位。華蓋在２９、３０嘅位置後面，一般都係俾頭髮遮住，有啲頭髮脫落咗就容易見到，有條骨伸向後腦，呢啲人好夠胆，可能係做賊都唔定，所以重要睇埋個鼻夠唔夠直。
印闊顴開福祿堪誇，雙中豐滿慧性可羨。
印堂在面部中央，山根之上，兩眉中間，亦叫明堂，在十二宮之中叫做命宮，係人嘅元氣精神凝聚嘅部位，亦都係腦髓嘅位置，道家特注重呢個位置，叫做上丹田，呢個位寬闊飽滿，顴開即係有肉面闊，通常都較為夠運。雙中即係１６天中，２５中正，豐滿，在細路期已經好聰明，但係大咗之後聰明與否就要睇印堂位夠唔夠豐滿，無論點，喺細細個時候都好得人鐘意。
根印太窄子晚妻遲，懸邊昏沉人亡家破。
根印即係山根印堂，太窄表示器量淺，加上眉心窄代表無貴人，同埋人緣唔好，性格唔夠開朗，結交朋友嘅機會就會小啲，結婚遲，生仔遲就係正常嘅。懸邊即係２９、３０、２８三個部位，在額上成倒三角形，換句話講即係額頭黑，家破人亡就未必，但係都衰到好緊要。
刑印光明訟厄永絕，嬪奸暗慘妻妾煩憂。
刑，係刑獄位，在印堂嘅兩邊，眉頭位置，印，就喺印堂，呢兩個位明亮就唔會有官司，一望埋去成個位好明亮，唔使講話無官司，當時重好好運添。嬪門在奸門嘅上指位，表屋企裏面嘅女人，奸門代表妻子，如果係女人嘅奸門上隻手指位，就代表屋企裏面嘅男人，奸門代表丈夫，呢兩個位灰暗就代表屋企裏面嘅男人或者女性令到自己好煩惱。
魚尾拂天倉貴而且壽，奸門平眉骨財祿兩全。
眼尾向上，或者魚尾紋向上，眼尾上彎，表示呢個人嘅性格好開朗，魚尾紋向上，直達天倉位，呢個人嘅行為好正派，但係要向下嘅紋短過向上嘅紋，或者小過向上嘅，如果長過或者多過就性格同行為都有問題。奸門平眉骨即奸門飽滿，奸門飽滿必得賢內之助，即係話得到異性嘅助力，通常都當作得到妻子嘅助力，其實呢個位係無分男女嘅。
山根見伏犀青雲直上，天井接天倉財祿同探。
山根見伏犀即係鼻樑位隱約有一條氣向上沖，表示呢個人際遇好好，做嘢嘅職位好高，又不斷有好嘅機會。天井位在天倉嘅後面近髮際嘅位置，天倉係埋財位，淨係理財位平滿，只不過係識得管錢，同埋可以將啲錢養大，但係積唔積到就要睇天井位，亦即係玄武位平滿無破損，表示搵得到同埋剩得到。
灶上屯倉不可空，半生衣祿在其中。
灶上即係鼻孔，屯倉即係鼻孔下面嘅橫肉，俗稱門檻，空即係無咗條橫肉同埋向下陷，如果係咁樣晚年嘅衣食就會差啲。如果加上食祿倉薄，就更加身体唔好，如果話成個晚年就言過其實，應該係六十前唔聚財就準確啲。
準隆樑直人無毒，面肉橫生性必兇。
準：讀音絕，準隆即鼻頭有肉，樑直即係鼻直，鼻又直，鼻頭又有肉，呢個人處事正直，心地又好，但係作為管理人就唔係咁理想，心地太軟，鼻頭尖就有原則，只要唔抑露孔，就唔會偏私。面肉橫生即係顴骨橫露，顴向橫生必定野蠻，如果加上露骨就唔止野蠻，重運惻忍之心都無埋，性格橫蠻無理夾心地唔好。
口闊唇方生來食祿，口小唇薄愛說謊言。
口闊唔係一味大，要有條件嘅，就係口闊要配四方形嘅口，所謂四萬咁嘅口，有呢啲口形就一生都人緣好，搵食就容易啲，但係亦都要口唇較為厚啲。如果口大而薄，講野尖酸克薄，就自然人緣唔好，唔好講話食祿，就連兩餐都有問題。唇薄就口舌招尤，口大就鐘意講嘢，唇薄亦都鐘意講嘢，但係口細而唇薄，講嘢唔負責任，鐘意講大話，如果係女人，就德行都有問題。
十三氣勢分析
第一天中對天岳，左廂內府相連續。
天中即係１５歲嘅位，一定要無美人尖，呢個位平表示呢個人性格好通情達理，如果飽滿高起就主少年運好，少年運好唔好，呢個位係先決條件，最緊要就係唔好後斜，呢個位置越飽滿就越多人提㩦，有癦同埋有「啦」都差啲。天岳又叫刑獄，在印堂嘅兩側，係額部最低位，天中相對呢度係一條直線，如果天中飽滿，天岳多數都靚啲，天岳個位唔靚就容易招惹啲無謂嘅是非，就算眼尾下垂，好怕事，啲是非都會走嚟惹你，，左廂內府係天中側邊第二隻手指位，左廂喺左邊，右廂喺右邊，天中係１６歲，所以如果有紋有癦表示屋企裏面一定有嘈吵令佢唔可以專心讀書。
高廣尺陽武庫同，軍門輔角邊地樂。
高廣喺天中嘅左右兩邊，天中兩邊各分九個部位，一隻手指位約佔兩個部位，左右一樣，順序為天獄、左廂、內府、高廣、尺陽、武庫、軍門、輔角、邊地，呢度話高廣、尺陽、武庫同，高廣代表掌權，有缺陷就表示容易失去權力。尺陽代表執行任務嘅時候嘅安全程度，呢個位置係天中同額角嘅中央，如果有紋有晦暗之色，出外工作就要小心，武庫絕不宜有癦，如果有癦或晦暗表示從事武職就會多意外。軍門亦係代表武職，但係同權力有關，輔角同邊地即係額角最高嘅位置，亦係額邊一隻手指位，如果呢個位凹陷，想升職就好難，如果飽滿就表示有異路功名，色暗就小心出外做事嘅安全，如果天中橫向後面一半都呈現暗色嘅話，就唔好講出外做嘢，就連出外旅行都有問題。
第二天庭連日角，天府房心父墓約。
天庭嘅左右共有九個位，左邊有日角，右邊就係月角，跟住就係天府房心、父墓、上墓、四殺、戰堂、驛馬、吊堂等九個部位。呢度主要係講天庭，其他部位都係輔助天庭的，首先天庭一定要同日月角相連飽滿，主幼年有父母福蔭，最忌有紋破，如果有氣直沖印堂主一路順風順水，無乜阻力，如果淨係日月角凸表示呢個人聰明但係好難教，天府喺日月角嘅側邊，如果日月角太高，天府位就低，呢個位低或色晦表示就算有高職位都無運行，亦都表示呢個人係身居高位而唔會体恤下屬嘅人，就算喺屋企都唔會對老婆好。房心呢個位飽滿就表示呢個人有為人師嘅資格，如果同日月角天庭相連貫就唔單止做老師，重有可能做國師。如果房心低陷色晦就會有誤人子弟嘅情形，父墓呢個位就係睇一個人有無回饋之心，有紋色暗就搵錢唔使俾老豆。
上墓四殺戰堂前，驛馬弔庭分善惡。
上墓就表示祖蔭，飽滿表示祖蔭得力，如果缺、紋、暗就表示好難有長輩嘅助力。四殺主一個人嘅內在威嚴，同戰堂一齊睇，戰堂飽滿表示有正義感，有紋色暗主鐘意惹事、爭訟，但多數輸嘅。驛馬位平滿，遷居遠行都係睇呢個位，有明王之色梗係好，色暗就唔好遠行，色赤主遠行有病。吊庭代表親人啲長壽與否，左邊代表內親，右邊代表外戚，那一邊嘅色暗，表示對你嘅負累，左邊吊庭表示內親去世或者重病，而對你有負面嘅影响。如右邊色暗表示外戚有病甚至去世，亦都係同你有關連的，如果氣色發青就唔係人地嘅事，而係自己的事，病嘅多。
第三司空額角前，上卿少府位相連。
司空在２２歲的位置，一隻手指位，左右同埋一樣，呢個位飽滿、光滑就好容易接近啲有地位嘅人，即係司空側邊一隻手指位要無紋，無破就可以成日接近啲有力人士，如果有紋破就好容易有官司問題。如果有紋侵入，加上理財位凹，就一定因爭訟而破財，如果有紋而加上鼻嘅顏色唔好，就可能失職，或者為官者會降職。上卿少府係代表容易接近貴人。
交友道中連額好，重眉山林看隱賢。
交友同道中呢兩個位要同驛馬一齊睇，如果飽滿無紋破，驛馬位色好，就會有朋友之助，包括咗去遠行順利，交友故名思義就真係講交朋結友，如果有少少紋就最唔好，在嗰段時間就真係會誤交損友。道中就係去第二度嘅途中，呢個第二度一定係要離開自己於生活嘅地方，如果有紋，尤其是係小毛毛嘅紋就最差，表示出外嘅途中有唔愉快嘅事出現。重眉出林兩位飽滿、靚就表示個人有勇氣，但係過於飽滿就會變成俾氣差，有缺就橫蠻。山林呢個位應該係頭髮邊一隻手指位，無破就表示呢個人嘅性格好隨和，如果凹陷就會流於小器。最後到隱賢，呢個位飽滿對自己嘅名氣好重視，等閒唔會做啲損害名氣嘅事。
第四中正接龍骨，虎眉龍角及輔骨。
呢度中正接龍骨唔啱，因為中正自己有名叫龍骨，２５歲至２８歲，年年都有職升，呢度飽滿明亮就做嘢好容易升職。應該係中正接龍角，虎眉即係虎角，亦即係中正位兩側一隻手指位，通常呢個位飽滿主有權力，如果你色好主有遠行升職，如果額頭黑就梗係差，但係通常都唔會成個額頭黑的，因為基於面無全色嘅基本條件，一定要判斷某一個部位，亦都唔係真係要黑先至衰，只要小小青暗就會有麻煩，輔骨即係中正第二隻手指位，係話呢個位平滿對做事嘅職位會高啲，亦即係話中正位最少都要有兩隻手指嘅闊度呭飽滿，呢個位飽滿就有人提㩦，所以中正位好緊要。
懸角斧戟井華蓋，福堂交外鎌色惡。
一路向額邊伸展，主一個夠唔夠胆，呢度係眉山上面嘅位置，華蓋主宗教或者正邪之事，或者鬼神之事過於高或過陷都主人嘅性格迷信，福堂主福祿之事，紅潤就有喜事，但係唔係自己嘅喜事或家人嘅喜事就要睇埋其他部位，如果福堂部位紅潤加上鼻樑色明亮就一定係自己有喜事，如果眉明潤就主兄弟有喜事，如果臥蠶紅潤就主兒女有喜事，如果未結婚，就一定係男女之事。如果奸門明潤就一定係夫妻間的喜事，郊外就真係主出外之事，呢度唔係講旅行，而只係講去平時少去嘅地方，嫌色惡即係氣色青藍就要小心，如果髮腳茸毛多都有問題，呢度近髮邊就較為難睇啲。
第五印堂刑獄起，相接蚕室林中紀。
印堂又叫做命宮，平滿如鏡，一生都好運，呢度係面相十二宮之一，係最緊要嘅部位，氣色青暗就會有大問題，一定係造嘢唔順利，呢度原則上係唔會光的，其次就係忌橫紋，忌無端有痣，有暗瘡，表示當時所謀嘅事肯定唔成功。刑獄又叫交鎖，貼住印堂位係印堂嘅輔助位，最忌由印堂有紋伸入，就容易惹官司。蚕室緊貼住刑獄，叫得做室就一定關係屋企裏面嘅人際關係，呢度係眉頭位置，如果眉頭生得過低或者眉頭有倒毛，就一定係屋企裏面出現好多麻煩。林中眉嘅四分一位置，呢度代表一個潛在能力，在惡劣環境之下會唔會氣餒，呢度係同蚕室一齊睇嘅，如果呢個位生得好表示喺唔如意嘅時候有家庭嘅支持。
酒樽神光及嬪門，劫門巷路青路裏。
酒樽就真係睇吓飲唔飲得，要配合神光一齊睇，神光係講理性化，無紋破就表示飲咗酒唔會亂性，如果呢度層皮好薄，就容易酒後亂性。嬪門係講同異性相處，如果有什毛，就同異性相處無咁容易相熟。劫門、巷路、青路呢三個位都係關於安全性的，劫門係人身安全，位置喺眉山之後，眉山後一隻手指位，千祈唔好凹，如果凹陷有紋，眉有破，就容易遇到劏死牛之事。巷路就代表一個人出入平安，最唔好就係有棟企嘅紋，就真係出入唔得平安，例如行路無端端跌倒，青路係講出入公門，如果眉尾位凹或有青暗就最好避免出入公家地方。
第六山根對太陽，中陽少陽太陰望。
山根在面相十二宮裏面係疾厄宮，主宰一個人嘅健康、波折、決斷能力，四十一歲之後嘅運氣，一個人嘅領導能力，亦都係財富嘅來源，山根係束龍位，如果山根厚，表示財源順利，有橫紋就表示有波折，如果山根沖上印堂，代表有貴人提㩦。太陽、中陽、少陽係左眼，太陰、中陰、少陰係右眼，就係呢度話嘅太陰望，眼睛瞳人細，眼一定藏神，３７、３８歲一定有大發展，眼尾向上就唔會性事，，呢度嘅太陽、中陽、少陽係左眼嘅成隻眼位，相對於右眼太陰、中陰、少陰亦都佔晒成隻眼位，如果兩隻眼嘅眼尾都向上就表示３９、４０可獲大利，但係如鴛鴦就呢兩年都唔會有好運，因為眼部一定要對稱，如果唔平衡就兩年都差，如果太陽太陰低陷就３５、３６會有破敗。
魚尾奸門天倉接，天井天門元中藏。
魚尾、奸門係同埋一齊推斷，要求係無紋，平滿，可得配偶嘅助力，以前就集中喺男性方面，呢個位好就有賢妻，現在好多女人呢個位生得好嘅都得到好老公。天倉就係我哋俗稱嘅理財位，飽滿就容易到財祿，低陷就好難有錢剩，搵得到都剩唔到，呢個部位包括埋天井、天門、中元（又名玄武）。天井係主偏財，有無橫財亦可以睇天倉嘅範裏面。天門同玄武（元中）係一齊，代表有無朋友的助力，亦要相關部位配合，就係眉尾夠結實就表示唔單止朋友多，重係有力嘅添。
第七年上夫座參，長男中男及少男。
年上係鼻樑位，與淚堂平衡，多數呢度都有節位，如果係見骨就有波折，如人為婚姻嘅事煩惱，男人就為錢煩惱，如果唔露骨就表示有侵咯性，進取性。如果有紋，在上半部嘅就主內親有問題，如果下半部就主外戚有問題。夫座在年上滑落鼻側位，呢個位低陷主有桃花，男女都一樣。夫座係女相嘅名，而男性就叫妻座，除咗低陷主多桃花之外，亦主嘢多指背，無論做得點努力都好，都好難得到讚賞，重兼夾多人篤背脊。左眼長男、中男、少男包括在淚堂，臥蠶位裏面，而女相就右眼代表長男、中男、少男，代表咗有無拍拖，結咗婚之後就代表仔女嘅好與壞，年輕時主仔女健康，晚年就主仔女對自己點樣。
金匱禁房盜賊動，游軍書上玉堂探。
呢幾個位該一齊睇，眼肚位置平滿有光澤，就好難會遇到盜賊，但係眼肚位置灰暗，加上有直紋或亂紋，就好大會遇到賊劫，最常見嘅就係俾人打荷包。游軍在眼白對下，呢個位相應額角嘅驛馬位，驛馬位係決定有無運行，而游軍就決定遠行會唔會有阻滯呢度主要係睇色嘅，如果色暗就有阻滯，但係未至於有意外。書上嘅位置喺奸門下面，係代表文件上嘅事，如果發覺呢個位有暗瘡，就要小心文件上會有錯漏，例如唔記得交費，或者簽錯名等等。玉堂就係權插天倉嘅位，係代表咗行使權力，最忌下陷，有權骨而呢個位低陷，表示有權力慾而無行使能力。
第八壽上甲匱依，歸來堂上正面時。
壽上喺鼻樑位置，年上之下，代表外戚，雖然叫壽，但係同長壽與否並無直接關係，如果色暗就代表屋企裏面嘅女人有麻煩，其實應該係老婆外家嘅麻煩。甲匱亦叫財庫，喺鼻翼嘅上方，一定要飽滿先至代表有才幹，低陷就唔慌會有才幹。歸來代表有無餘錢，係勺陳位嘅下方，色好亦代表有遠方信息。堂上正面兩位一体，喺眼下吋半左右，亦都叫禾倉，中年運就除咗睇鼻之外就要睇正面呢個位，呢個又係正權骨位，銀匙歌裏面有云：「中年倉庫看禾倉，禾倉有陷無餘糧」，又有一句「更有禾倉陷一寸，中年猶未有夫娘」，最忌低陷無肉。
姑姨顴勢好兄弟，外甥學堂命門基。
姑姨同顴勢亦代表外戚嘅力量，再加埋外甥呢個位，好多人面嘅中線位有橫紋，就表示佢成日都受外戚嘅左右，自己揸主意嘅時候就自然好多唔等使嘅人加啲意見，令你左右為難。兄弟又真係代表兄弟，呢度一堆名辭其實就係面珠位，呢度飽滿唔單止相貌靚，重好得人緣。學堂位置喺耳前髮腳前一手指位，飽滿就多數都可以讀得成書，如果見根就讀書好難有成。命門即耳門前一手指位，命門色好就表示精神飽滿。
第九準頭蘭廷正，法令灶上宮室盛。
準頭係財星嘅尖端，山根就係財星嘅來龍，所以睇準頭一定要自己來龍，來龍窄準頭可以尖，來龍厚準頭一定要圓，但係無論係尖或者圓，皮一定要厚，如果皮薄就講乜都多餘。蘭廷即係諫台，廷頜兩邊鼻翼，要厚要夠闊，夠闊就財運好，夠厚就手段光明正大，如果又薄又窄，氣量淺，好多事都弄巧反拙。法令要喺４５歲後見到就最好，太早見法令就辛苦，女人就老公辛苦，兩條紋開闊就有權威，有人緣，過深性格頑固，過淺未有法令嘅作用，斷續表示腳有問題，同時一定要過口，唔過口就鎖唔住水星，講嘢唔負責。灶上即係鼻尖嘅橫肉，係睇一個人到老嘅時候有無積聚，如果無呢條肉，就容易俾親人劫財。宮室係鼻周圍顏色，有微血管見到表示夫妻感情唔好。
典御囤倉後閣連，守門兵卒及印綬。
典御喺法令側邊兩隻手指位，係指出外嘅適應能力，亦都代表對環境嘅適應性。囤倉係面部嘅中間，即係酒渦位，通常有酒渦嘅人老咗就要為兒為女担心。後閣接近牙較位置，通常食嘢嘅時候呢度會郁，越係郁動就表示唔可以坐定喺度做嘢，一定要周圍走。兵卒同印綬兩個位一齊睇，貼近耳仔位置，呢個位低陷就想指人做嘢都好難，如果加上食指短就好難身居高位，呢度幾個位置都係以氣色為主，最好唔俾頭髮蓋住。
第十人中到井部，帳下細廚內閣附。
人中嘅標準係長、闊、深、正中、有溝壁，代表咗仔女嘅多少，女性就代表生產能力，忌短、淺、歪、窄，如果青年人無人中，多數都要領養他人之子，人中無毛子亦少，亦代表咗管理能力低。井部包括咗仙庫、食祿倉，一定要厚，薄親就身体有問題，牙力亦唔好，如果笑嘅時候縮咗上去，到老可能要捱餓。帳下、細廚、內閣，係法令插穿而過嘅位置，如果法令啱啱喺呢度開义而入口嘅話，想唔餓死都唔得，最唔好就係有粒痣，所謂美人痣，就一生都會捲入多角嘅關係之中。
小使還當妓堂前，嬰門博士懸壁路。
小使妓堂同埋一齊睇，係代表有無使人嘅命，配合奴僕宮夠唔夠飽滿，如果奴僕宮有紋或凹陷而小使妓堂平滿都有補救嘅能力，如果連呢度都有橫直紋破，想啲工人聽話就好難。嬰門博士同埋一齊，位置喺牙較前面，代表咗有無一技之長，如果食嘢嘅時候呢度向內凹，就表示呢個人無乜特別技能，可能係週身刀嗰類。懸壁位置喺咬嘢凸起嘅位，如果咬嘢唔凸起，到老身体一定多病，如果太過凸，呢個人時刻都諗住作反的，亦可以話成日都諗住點樣去「發圍」不甘心居人之下。
十一正口閣門對，比鄰委巷通衢五。
口唇厚薄均等，兩角向上彎性格優良，有正義感。唇薄而無稜講嘢唔負責任，口角圓而厚，慾念旺盛，体形細而口大就主容易出人頭地，体形大而口小就性格保守，氣量淺。閣門嘅位置喺口角，好多人嘅口角都有一舊肉，口角有一舊咁嘅肉，呢個人就一定講嘢好有威嚴，如果加上法令夠深，唔止有威，重有權力。比鄰喺閣門嘅側邊，書上話「比鄰平滿必有芳鄰」，呢度有橫紋，就一定同隔離鄰舍嗌咬。委巷通衢呢兩個位代表出入，代表年老嘅時候出入平唔平安，如果有紋有痣就要小心行路容易有意外。
客舍兵蘭家庫中，商旅生門從續繼。
客舍係代表一個人唔好客，如果有皺紋，呢個人就唔多鐘意招呼啲人番屋企。兵蘭同家庫一齊，代表咗呢個人對門戶嘅小心程度，如果呢個位好飽滿嘅，就算落樓下攞信都要鎖晒所有嘅門先至放心嘅。商旅生門代表咗做生意嘅手法，呢位近腮邊牙較部份，如果皮包骨表示呢個人營商未必會正當嘅手段。從續喺牙較位耳下面，係代表持久力，做嘢會唔會三分鐘熱度。
十二承漿居宅安，還有外苑林苑看。
面上任何部位都唔主張凹，但係人中同承漿就要有凹陷。人中飽滿就生殖能力衰退，承漿飽滿到老會無積聚，但深得嚟太窄主呢個人又孤寒，加上理財位飽滿，就更加一毛不拔。居宅喺承漿嘅側邊，呢個位就應該平，亦即係話承漿凹嘅位置唔可以太闊，如果太闊就會影响呢個位置，因為居安呢個位係代表咗可唔可以長期住一間屋，搬屋嘅機會多唔多。外苑同林苑即係咀角過啲，通常住村屋而有啲花園嘅人，呢個位置都會靚啲，但係依家好多喺深圳有屋嘅人呢個位都好靚，就同有無錢嘅關係唔大。
下墓莊田酒地上，郊廓荒坵道路寒。
下墓係代表咗墓地嘅好壞，呢個位無紋無癦，可以預知自己會有一個好嘅墓地，古時嘅人對自己將來嘅墓地係好重視嘅，所以先至有一個部位專表示自己來嘅墓地。莊田同酒地係代表咗６０歲之後嘅生活係頻撲抑或優柔，古書話莊田平滿安享天年，所以呢度無亂紋就表示晚年生活安定，而酒地就係顠示咗食嘢嘅能力，要同食倉一齊睇。郊廓係代表咗六畜嘅平安，依家好少有六畜，而係養寵物嘅多，呢個位皺皮有紋嘅話，就算養幾條魚毛仔都要游背泳嘅。荒坵、道路係表示老年人行路嘅安全程度，位置喺近腮邊，老人家容易跌倒就係呢個部位薄而見骨，上車落車都要小心。
十三地閣下舍隨，奴僕碓磨坑塹危。
地閣嘅要求係無紋，肉厚，圓或者方都係好嘅，地閣圓就表示性格較為和順，地閣方就表示性格較為執著，如果方而凸出就鐘意理事，因為地閣係代表實行能力，最忌向後縮、薄、尖、露骨。下舍應該同奴僕一齊睇，有橫紋就想有人聽你話都好難，重兼好容易俾人累，如果咀角有直紋就好啲，法令夠長就好啲。確磨係種工具，喺以前就係生財工具，喺依家亦都代表生產工具，呢個位置喺同眼成直線嘅位，如果有暗瘡就所用嘅工具會時時壞，就算電視錄影機都會隨時壞。坑塹應該係依家嘅圍欄，有暗色表示住嘅地方會有損壞，依家最常見嘅就係水喉壞。
地庫陂池及鵝鴨，大海舟車無憂疑。
地庫又叫地倉，呢個位豐滿係好緊要，因為呢度係成個腮邊嘅中間位，所以呢個位豐滿就可以令到側邊幾個置都連帶好埋，但係都要配合天倉豐滿，地閣有肉，就應古書上嘅地庫圓闊，家有餘錢，如果人肥而地庫薄就晚年好極有限。陂池，鵝鴨近腮骨位，但係要配合酒渦位嚟睇，有酒渦係唔好嘅。陂池、鵝鴨薄而有酒渦就想有錢剩都難，如果陂池鵝鴨厚而有酒渦就表示仔女唔得力，如果加上子女宮差，就嗰啲仔女就一定走入歧途。大海舟車就係耳後見腮嘅位置，呢個位如果皮薄見骨就主遠行失利，尤其是移民係最差嘅。如果驛馬位薄而陷就唔好講話去移民，就算去短線旅行都會有唔愉快嘅事發生，例如遺失行李，或者與團友嗌交。