壬寅年說

甲戊壬壬
寅子寅寅
12 11 10 9  8  7  6  5  4  3  2  正
癸 壬 辛 庚 己 戊 丁 丙 乙 甲 癸 壬
丑 子 亥 戌 酉 申 未 午 巳 辰 卯 寅

五術係相通的，任何時候都有術數師以各種方式去預測個人未來，地域的人文經濟，甚至世界局勢等等，在N年前我都嘗試用文王卦來預卜香港流年，當然唔夠準繩，不斷試咗好多次都係唔準，後來我卒之明白了個中原因，原來係自己在這個範圍唔夠分量，由此開始我就知道好多自以為可以幫這個地方問前程嘅高人，都只不過係順住時勢解卦（可以由紀錄證明），一句說話可以解釋點解唔準嘅原因，就係你係老幾呀？

每個地方，每個地區都只得一個人有資格作為代表，不過呢個人肯定唔會做呢種佢認為無聊嘅事。亦都有部份用風水方位判斷地域嘅當年運氣如何，理論上就係應該有幾成準，但距離標準八九成重好遠，原因係本地冇一個公認嘅地標，當要預測這個地方的氣運時，都茫然不知何處有資格作為這個地方的標的，好多有料嘅大師談論本地氣運時，好多位置都係含糊其詞，永遠都唔會用鐵口直斷的語氣，因為實在冇人有這種膽量（有啲就係講定今年會有大車禍，大火災等等，從來冇確實邊度，幾時，等於阿媽係女人）。

更有啲就係上一次講過的，到今次已經唔記得，唔講就當冇。例如判斷幾時通關，次次都係自動更新，完全唔使面紅。

有部分有咁上下料子嘅人用子平命理作為判斷工具，有好多真係值得佩服，早半年就可以預測下年嘅流年狀況，真係有幾成準，如果離行離列的話，下年都唔使再出書啦。

今年這組立春八字要預測就真係絕對容易，子平命理講究嘅只有一個原則，就係平衡，平衡就係好命，失衡就係衰命，睇吓上面嗰八隻字，一睇就知道係嚴重失衡。

好少有這樣的立春八字，這組八字格局一面倒，側埋一邊，現實環境亦都係一面倒，完全唔平衡，未來一年少有公義可言，要判斷大勢，用八隻字就可以概括，就係貧者越貧，富者越富，由於五行有所欠缺，知命者就知道以柔制剛，硬碰硬係冇得玩嘅，千萬不要自覺偉大，大家都知道身弱遇煞即係身弱見鬼頭，頭四個月寅卯甲乙就認真難捱，估計好多人都捱唔過，因為七煞係極度消耗財星的，所以必然好多人破產。

這組八字雖然係古怪，但係都唔值得花時間去深究，因為這類型的立春八字永遠都唔會再有出現，原因係下一次的壬寅年己經係上元二運（現在係下元八運）。

如果要用人文生活來演釋呢組八字，都係好簡單，就係邊個做管理員邊個死，除非係好好運先至可以有好下場，但係好運的人都無乜機會做到呢個職位。

健康方面就更加冇好野講，強煞攻身，實在防不勝防，春季木旺自然身弱見鬼，有少少唔妥就即刻要搵醫生。

夏季強木生火剋金，一定出現好多肺部疾病，因為五行欠一，亦都有好多人患直腸相關的病，最多就係排泄困難。

秋季金旺，理論上就係秋高氣爽，氣候乾燥就可保天下太平，如果反常地潮溼，一定醫院排長龍（要問廿四萬一個月的人）。

冬季水旺，原局天透地藏，財旺生助強煞，有心臟病者要極度小心，稍一不慎，就不再醒來。

人以群分，六十歲以上的人會有好多不可預知的煩惱，推算係來自仔女。

因為這組八字陰陽唔平衡，估計婚嫁會比往年少好多，但係風化案件肯定會比往年多，推算犯案者係來自已婚男人（女人唔引誘，男人點會犯罪呢）。 行業衰旺就真係唔識睇，但係有人問就一定要答，金融業無論升升跌跌，都係搵錢既平台。地產業肯定有升冇跌，要搵錢就要喺呢兩個行業埋手。