辛丑年方位

今年六白入中宮，六白係武曲星，六白係代表學校以外的考試，包括咗升職，辛丑年一般的打工仔想升職係一件困難事，命格缺金的人更加諗都唔使諗。唯一可以試試的就係令到中宮同正西位無野阻隔（做成六八同宮，九貴人出現），想升職仲有少少機會，否則疊埋心水等明年。

西北方在辛丑年係官非位，一般人都好驚有官非，又驚有是非，因為大多數人將是非同官非混為一堆，其實要惹官非唔係咁容易（唔係抄牌，垃圾蟲咁簡單就叫做官非），官非分主動惹返嚟同被動惹嘅，黃之鋒嘅就係叫做主動惹官非，連城訣裏面個傻仔就係被動惹官非。要化解主動既官非最好容易，只要喺露台種幾棵黑豆，就可以將主動惹官非嘅心態化解於無形。至於被動埋身嘅官非真係防不勝防，除咗恒常態之外，見到有異常態，就要用水養多根植物化解，但係呢啲官非大部份都係同大過自己既人爭執而來的，所以免得過都唔好同啲老野爭執，實蝕底既。呢個位係針對年紀細嘅人，或者一家最受寵愛的年青人，惹禍既機會最大，亦都唔容易化解，都好難分主動定被動。

正西方係辛丑年嘅財位，無人以財為忌嘅，更加唔會有人去化解財星嘅，只有端端度度去增旺財位，其實財位唔使加旺，只要正西為唔係廁所，或者缺角，就表示未來一年財源多數穩定，如果係廁所嘅話，就要保持乾爽通氣，最好常開抽氣扇，如果係缺角位，要補救仲容易，只要勤力勤力再加勤力就得啦。

正東方係一般人所講嘅三煞位，通常都容易有意外之事，最大機會就係腳傷。亦都會喺職位上面出現問題，最好就係唔好轉工（所轉嘅必定係三煞位），上司同下屬都對你有意見，如果所轉嘅係最低層嘅職位就冇事，因為唔會有人篤你背脊。

如果家中有學生，呢個位置就係最為人所道既文昌位，要催旺文昌就話都無咁易，只要外面環境無沖剋就肯定得，見水就用木，見木就用水，但係有先決條件就係有人鍾意讀書，如果真係唔得就只有其諸下一年，因為壬寅年文昌歸位。

一提起五黃位，就俾一般大師釘死咗佢係十惡不赦嘅衰位，郁親佢一定死人冧樓，一個單位嘅東南方如果有人掘地，在牆壁打一口釘，都會一身蟻，如果有地盤打樁就一定死得人多，總之唔嚇死人唔收口，如果呢個位置真係有咁嘅威力就真係天下太平喇，東南方位最怕有突發情況，即係異常態，見到有平時唔同嘅景象，要用個鈴鈴搖幾下就得，完全唔使緊張，預先擺個上鏈公仔每日郁動一下即可。如果係冷氣機位，抽風機位，大門口位（恆常態），完全唔使驚，只要保持清潔整齊即可。

東北方係喜慶位，需要有火才可產生作用，但東北方係太陽最弱嘅位置，就只有用人做火來催旺，方法有好多，但係先決條件就要有後生一齊住，就可以將喜慶位作用引出，如果淨係得老人家，就只係得平安兩隻字，即係平安是福。呢個係女性位，所以有後生同住就有喜慶事出現，唔需要做任何嘢只要唔缺角就得。

正南係一般公用嘅桃花位，亦都係人緣位，桃花旺唔代表人緣好，但係人緣好者多數都會帶旺桃花。風水嘅作用主要就係健康，之後就係和洽，呢兩樣嘢都可以喺正南位求得，但辛丑年大部分人都無什麼人緣，人與人之間嘅疏離感越嚟越強烈，要催旺桃花實在唔容易，如果發覺有好多人針對自己，就可以用一個銅盤或者銅香爐養浮萍，或者將觀音竹剪成六吋長，放喺盆裏面用水養，可令自己圓滑一啲，亦都容易接觸到或者容易認識異性朋友。

正北係病位，同流年對著幹，同方位對沖，所以雙重沖剋之下，今年疾病特別多，唔單止病嘅人多，疾病的種類亦都多，化解方法好有限，如果正北方外面有動土跡象（未到真正動土），就要開始化解，只有用最老土嘅方法，最有效就係用銅鑼，佢每日未時敲打六下，保證平安大吉，如果呢個方位係一幅牆，密封無窗，就只要整齊清潔即可，唔使搞任何動作，無嘢唔好搞嘢。

西南位係大是非位，亦都係盜賊位，亦都容易應在女人身上，如果呢個位封塵，就會令女人產生貪念，引申為有官非，如果係雜亂無章，就會俾人篤背脊，篤死為止，如果係清潔整齊就表示你好叻，招人妒忌，無需化解，不招人忌是庸才，所以唔使花時間去化解。

總結今年並不睇好，因為二克，三碧，五黃所座落的位置，都係與原局對沖的，加上今年係辛丑，十二個月之中佔咗八個月都係天地不和，無論健康與財富都同風水原意背道而馳，流年方位好少今年咁明顯，唔似得庚子年的在迷霧之中，所以判斷吉凶並不因難。

如果睇得明白就唔使要學理版